Имрӯз дар Китобхонаи миллии Тоҷикистон бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон ба муносибати Рӯзи Конститутсияи Ҷумҳурии Тоҷикистон таҳти унвони “Конститутсия - заминаи рушди қонунгузории Ҷумҳурии Тоҷикистон” Конференсияи ҷумҳуриявӣ баргузор гардад.
Конференсияро Раиси Кумитаи кор бо занон ва оилаи назди Ҳукумати Ҷумҳурии Тоҷикистон Файзиддинзода Бунафша оғоз бахшида иброз доштанд, ки Конститутсияи кишвари мо дастоварди бузурги миллӣ ба ҳисоб меравад, чунки он дар давраҳои бениҳоят душвору баҳснок ва аз ҷониби тамоми мардуми Тоҷикистон қабул гардидааст.
Гуфта шуд, ки бо шарофали сулҳу ваҳдати миллӣ, иқдом гирифтан дар роҳи барпо намудани давлати демократӣ, дунявӣ ва ҳуқуқбунёд Ҷумҳурии Тоҷикистон кӯшишҳои худро ҷиҳати ҳифзи ҳуқуқу озодиҳои инсон тавассути мустаҳкам кардани заминаи қонунгузорӣ ва татбиқи сиёсат дар самти масъалаҳои занон ва бонувон мунтазам тақвият мебахшад. Бо дарки муҳимияти дастгирии қувваи ин ду қишри ҷомеа ҳамчун қувваи асосӣ ҷиҳати амалӣ намудани сиёсати иҷтимоӣ тавассути истифодаи нерӯи занон ва бонувон дар ташаккул, пешрафти давлат ҳифзи арзишҳои фарҳанги миллӣ ва ниҳоди давлатдорӣ яке аз самтҳои афзалиятноки давлату ҳукумат маҳсуб меёбад.
Иброз гардид, ки сиёсати созандаи Пешвои миллат муҳтарам Эмомалӣ Раҳмон дар солҳои соҳибистиқлолӣ имкон фароҳам овард, ки мақому манзалати занон дар ҷомеа ба маротиб баланд бардошта шуда, дар замони марҳилаҳои навин ягон самти фаъолиятро бидуни ширкати фаъоли занон тасаввур намудан ғайриимкон аст.
Хусусан саҳми онҳо дар бахшҳои илму маориф, фарҳангу тандурустӣ ва дигар самтҳои ҳаёти иҷтимоиву иқтисодии кишвар торафт афзун гардида истодааст. Занону модарон бо азму иродаи қавӣ кӯшиш намуда истодаанд, ки рисолати пурмасъулияти ватандорию ватансозиро пешаи худ созанд.
Минбаъд низ занони созандаи кишварро мебояд, ки ба қадри соҳибихтиёриву соҳибдавлатӣ, сулҳу суббот ва оромии ҷомеа расанд, истиқлолияту озодии сарзамини аҷдодиро чун гавҳараки чашм эҳтиёт намуда, дар рушди Тоҷикистони азиз саҳми босазо гузоранд.
Дар кори конфронс Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ Ализода Зариф, Директори Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон, Файзализода Ҷумахон, муовини Раиси Суди Конститутсионии Ҷумҳурии Тоҷикистон Абдураҳимзода Дилором вобаста ба нақши Конститутсияи Ҷумҳурии Тоҷикистон дар таҳкими пояҳои давлатдорӣ ва рушди ҷомеаи ҳуқуқбунёд маъруза намуданд.
