Имрӯз ҷаласаи ҷамъбасти фаъолияти шашмоҳаи Муассисаи давлатии "Мактаби ҷумҳуриявии маҳорати олии варзишӣ оид ба намуди бадминтон ва теннис" баргузор гардид. Дар ҷала са Сардори раёсати рушди варзиши касбӣ ва кор бо ташкилотҳои варзишии Кумитаи кор…
Имрӯз ҷаласаи ҷамъбасти фаъолияти шашмоҳаи Муассисаи давлатии "Мактаби ҷумҳуриявии маҳорати олии варзишӣ оид ба намуди бадминтон ва теннис" баргузор гардид.
Дар ҷаласа Сардори раёсати рушди варзиши касбӣ ва кор бо ташкилотҳои варзишии Кумитаи кор бо ҷавонон ва варзиши назди Ҳукумати Ҷумҳурии Тоҷикистон Суфизода Давлат иштирок намуда, фаъолияти муассиса дар шаш моҳи аввали соли 2026-ро мавриди таҳлилу баррасии ҳамаҷониба қарор дод.
Зимни ҷаласа роҳбарияти муассиса оид ба натиҷаҳои фаъолияти шашмоҳа ҳисобот пешниҳод намуда, зикр гардид, ки дар давраи ҳисоботӣ ҷиҳати татбиқи сиёсати давлатӣ дар соҳаи тарбияи ҷисмонӣ ва варзиш, рушди намудҳои бадминтон ва теннис, омодасозии варзишгарони соҳибмаҳорат, ҷалби наврасону ҷавонон ба машғулиятҳои мунтазами варзишӣ ва иштироки варзишгарон дар мусобиқаҳои ҷумҳуриявию байналмилалӣ як қатор корҳои назаррас ба анҷом расонида шуданд.
Сардори раёсат зимни суханронӣ таваҷҷуҳи масъулинро ба иҷрои босифати дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар самти рушди соҳаи варзиш ҷалб намуда, вобаста ба дар сатҳи баланд таҷлил намудани 35-солагии Истиқлоли давлатии Ҷумҳурии Тоҷикистон, баланд бардоштани ҳисси ватандӯстӣ, таҳкими интизоми меҳнатӣ, такмили сатҳу сифати машқу тамринҳо, истифодаи усулҳои муосири омодасозии варзишгарон ва баланд бардоштани натиҷаҳои варзишӣ ба масъулини муассиса дастуру супоришҳои мушаххас дод.
Ҳамчунин, масъалаҳои баланд бардоштани сифати раванди таълиму тамрин, такмили фаъолияти таълимию методӣ, истифодаи самараноки имкониятҳои мавҷуда, таҳкими заминаи моддию техникӣ, рушди захираи варзишии кишвар ва иштироки арзандаи варзишгарон дар мусобиқаҳои сатҳи ҷумҳуриявию байналмилалӣ мавриди баррасӣ қарор гирифта, барои бартараф намудани камбудиҳои ҷойдошта ва рушди минбаъдаи фаъолияти муассиса вазифаҳои мушаххас муайян гардиданд.
Дар фарҷоми ҷаласа фаъолияти Муассисаи давлатии «Мактаби ҷумҳуриявии маҳорати олии варзишӣ оид ба намудҳои бадминтон ва теннис» дар шаш моҳи аввали соли 2026 қаноатбахш арзёбӣ гардида, ҷиҳати боз ҳам беҳтар намудани фаъолияти муассиса, баланд бардоштани сатҳи омодагии варзишгарон ва ноил гардидан ба натиҷаҳои назаррас дар арсаҳои ҷумҳуриявию байналмилалӣ ба роҳбарият ва ҳайати мураббиён супоришҳои дахлдор дода шуд.
