Дастурамали мутахассиси шуъбаи илм

Замимаи 5 бо фармоиши cардори Саридораи геологияи назди Ҳукумати Ҷумҳурии Тоҷикистон аз « 01 » апрели соли 2024, № 25-Ф тасдиқ карда шудааст ДАСТУРАМАЛИ мансаби мутахассиси шуъбаи илм ва таҳияи ҳуҷҷатҳои меъёрии Саридораи геологияи назди Ҳукумати…

Замимаи 5

бо фармоиши  cардори Саридораи  геологияи назди Ҳукумати  Ҷумҳурии Тоҷикистон

аз « 01 » апрели соли 2024,№ 25-Ф

тасдиқ карда шудааст 

 

ДАСТУРАМАЛИ

мансаби мутахассиси шуъбаи илм ва таҳияи ҳуҷҷатҳои меъёрии Саридораи геологияи назди Ҳукумати Ҷумҳурии Тоҷикистон

 

1. Муқаррароти умумӣ

 

1. Номи мансаб – мутахассиси шуъбаи илм ва таҳияи ҳуҷҷатҳои меъёрии Саридораи геологияи назди Ҳукумати Ҷумҳурии Тоҷикистон.
2. Мансаби мазкур тибқи Феҳристи мансабҳои давлатии Ҷумҳурии Тоҷикистон ба мансабҳои категорияи ҳафтум мансуб аст.
3. Ишғолкунандаи мансаби мазкур ба сардори Саридораи геологияи назди Ҳукумати Ҷумҳурии Тоҷикистон тобеъ ва ҳисоботдиҳанда мебошад.
4. Мутахассиси шуъбаи илм ва таҳияи ҳуҷҷатҳои меъёрии Саридораи геологияи назди Ҳукумати Ҷумҳурии Тоҷикистон (минбаъд – мутахассис) аз тарафи сардори Саридораи геологияи назди Ҳукумати Ҷумҳурии Тоҷикистон (минбаъд - сардори Саридора) ба мансаб таъин ва озод карда мешавад:

 

2. Талаботи тахассусӣ

 

5. Мутахассис бо риояи талаботи тахассусии зерин мансаби мазкуро ишғол менамояд:

• донистани Конститутсияи Ҷумҳурии Тоҷикистон, қонунҳо, дигар санадҳои меъёрии ҳуқуқии Ҷумҳурии Тоҷикистон ва санадҳои ҳуқуқии байналмилалии эътирофнамудаи Ҷумҳурии Тоҷикистон, ки иҷрои уҳдадориҳои мансабии шуъбаро ба танзим медароранд;
• донистани таърих, фарҳанг, муқаддасоти миллӣ, забони давлатӣ, як забони хориҷӣ;
• донистани самтҳои асосии сиёсати дохилӣ ва хориҷии Ҷумҳурии Тоҷикистон;
• мавҷудияти дониш ва малакаи ба нақшагирии раванди кор;
• малакаи хуби муошират, аз ҷумла, маҳорати ба роҳ мондани ҳамкорӣ ҳангоми татбиқи манфиатҳои давлатӣ;
• на камтар аз 1 маротиба дар 3 сол баланд бардоштани тахассуси касбӣ;
• маълумоти олии соҳаи геология;

 

• кор карда тавонистан бо компютер.

 

3. Уҳдадориҳои мансабии мутахассиси шуъба

 

6. Мутахассиси шуъба дорои уҳдадориҳои зерин мебошад:

• супоришҳои роҳбарияти Саридора ва сардори шуъбаро дар муҳлатҳои таъиншуда иҷро менамояд;
• дар баррасии лоиҳаҳои санадҳои меъёрии ҳуқуқии Ҷумҳурии Тоҷикистон, ки аз тарафи дигар мақомоти давлатӣ барои мувофиқа пешниҳод карда шудаанд, дар якҷоягӣ бо дигар кормандони шуъба иштирок менамояд;
• дар баррасии лоиҳаҳои санадҳои меъёрии ҳуқуқӣ ва дигар санадҳои Саридора дар якҷоягӣ бо дигар кормандони шуъба иштирок менамояд;
• эҳтиёҷоти соҳаҳои иқтисодиётро ба ашёи минералӣ меомӯзад;
• вазъи бозори ҷаҳонии ашёи минералиро меомӯзад;
• базаи ашёи минералии корхонаҳои кӯҳро меомӯзад;
• дар таҳияи ҳуҷҷатҳои меъёрию ҳуқуқӣ вобаста ба соҳаи геология иштирок мекунад;
• дар асоси қонуни Ҷумҳурии Тоҷикистон “Дар бораи сарватҳои зеризаминӣ” ва дигар қонунҳои амалкунандаи Ҷумҳурии Тоҷикистон фаъолияти худро ба роҳ мемонад;
• мувофиқи Низомномаи Саридораи геология фаъолият менамояд;
• дар бораи усулҳои ҷустуҷӯ ва иктишофи ашёи минералӣ маълумоти мукаммал дошта бошад;
• талаботро оид ба нигаҳдорӣ ва муносибат ба ҳуҷҷатҳои корӣ риоя намояд, дар коргузорӣ навовар бошад.

Дигар ваколатҳои шуъба, супоришҳои сардори Саридора ва муовинони сардори Саридораро иҷро менамояд.

 

4. Ҳуқуқҳои мутахассиси шуъба

 

7. Мутахассиси шуъба дорои ҳуқуқҳои зерин мебошад:

• дар баррасии масъалаҳои ба фаъолияти шуъба дахлдошта ва қабули қарор аз рӯи онҳо иштирок менамояд;
• маводҳои дар ихтиёри саридора қарордоштаро меомӯзад;
• бо тартиби муқарраргардида иҷрои масъалаҳои таҳти назорати шуъба қарордоштаро аз мақомоти дахлдор ва ё шахсони мансабдор талаб намояд;
• бо тартиби муқарраргардида аз идораҳои дахлдор маълумот ва маводҳои барои иҷрои уҳдадориҳои мансабӣ заруриро талаб карда гирад;
• мутахассиси шуъба дорои дигар ҳуқуқҳое мебошад, ки санадҳои меъёрии ҳуқуқии Ҷумҳурии Тоҷикистон пешбинӣ намудаанд.

 

5. Масъулияти мутахассиси шуъба

 

8. Мутахассиси шуъба барои иҷро накардан ва ё ба таври дахлдор иҷро накардани уҳдадориҳои мансабӣ, истифодаи ғайри мақсаднок ва нобуд сохтани моликияти барои иҷрои уҳдадориҳои мансабӣ вобастакардашуда тибқи қонунгузорӣ ба ҷавобгарӣ кашида мешавад.

 

6. Муқаррароти хотимавӣ

 

9. Аз тарафи хадамоти кадрӣ ба мутахассиси пешбари шуъба бо гирифтани имзо, сабти ному насаб ва гузоштани таърихи рӯз дар китоби бақайдгирӣ, нусхаи Дастурамали мансабии мутахассиси шуъба супорида мешавад.
10. Ҳангоми таҷдиди шуъба ва дигар ҳолатҳое, ки боиси тағйир ёфтани Дастурамали мансабии мутахассиси шуъба мегарданд, Дастурамали мансабии мазкур аз нав таҳия ва тасдиқ карда мешавад.