ТАБРИКОТИ  директори Агентии Тоҷикстандарт  муҳтарам Раҳмон Исломиддин Хайриддин  ба муносибати 29 - солагии Рӯзи Ваҳдати миллӣ

ТАБРИКОТИ 

директори Агентии Тоҷикстандарт 

муҳтарам Раҳмон Исломиддин Хайриддин 

ба муносибати 29 - солагии Рӯзи Ваҳдати миллӣ

 

Ҳамватанони азиз!

 

   Боиси хушнудист, ки таҷлили ҷашни Ваҳдати миллӣ ҳамчун санаи муборак ва муқаддаси миллӣ сол то сол нуфуз ва шукӯҳу шаҳомати хоса пайдо карда, дар ҳаёти сиёсиву иқтисодии мамлакатамон нақши хотирмон гузошта истодааст ва бешубҳа ин рӯз дар саҳифаи таърих бо ҳарфҳои заррин сабт хоҳад гардид. 

   Имсол низ ин ҷашни муқаддасро халқи мо бо дастовардҳои наҷибу шукргузорӣ аз пойдории он таҷлил менамоянд.

Бо истифода аз фурсат, ҳамаи Шуморо ба муносибати таҷлили 29 - солагии Рӯзи Ваҳдати миллӣ - рӯзи ба имзо расидани Созишномаи умумии истиқрори сулҳ ва ризоияти миллӣ, ки бузургтарин сармояи халқи мост, самимона ва сидқан табрик мегӯям.

   Ваҳдати миллӣ, тавре борҳо Пешвои миллат муҳтарам Эмомалӣ Раҳмон зикр намуданд, омили муҳимтарини ҳастии миллат, ватандорӣ ва давлатдории соҳибистиқлоламон мебошад. Тараққиёти ҷомеа аз он шаҳодат медиҳад, ки ваҳдати миллӣ ҳамчун зуҳуроти ҷамъиятӣ вобаста ба сохти давлатдорӣ, муносибатҳои иқтисодию иҷтимоӣ ва сиёсӣ ташаккул ва рушд меёбад.

  Зарурат ва аҳамияти бузурги ваҳдати миллӣ махсусан дар давраи соҳибистиқлолии давлатӣ эҳсос мешавад. Зеро ки соҳиб шудан ба истиқлол барои ҳар як халқу кишвар кори осон нест, вале ҳифз ва таҳкими он мушкилтар аз он аст. Роҳи расидан ба истиқлол ва ваҳдати миллӣ шояд дар тасаввур осон намояд, вале ҳаёт нишон медиҳад, ки ҳифзи истиқлол ва ваҳдати миллӣ аз ҳар як сокини кишвар ҷаҳду талошҳои зиёд, маърифатнокӣ ва фарҳанги сиёсии баландро талаб менамояд.

   Воқеияти зиндагӣ ва таҷрибаи ҷомеаи ҷаҳонӣ собит месозад, ки агар шаҳрвандон маърифати баланди сиёсӣ надошта бошанд, дар байни онҳо ваҳдату якдилии устувор ба вуҷуд намеояд. Аз ин лиҳоз моро зарур аст, ки аз тамоми нерую имкониятҳои хеш ҳамарӯза баҳри баланд бардоштани сатҳи маърифату шуури миллии мардуми кишвар, фарҳанги сиёсии ҷомеа, тақвияти ваҳдату якдилии халқи сарзамини хеш, беҳ намудани шароити иқтисодию иҷтимоии аҳли ҷомеа ва рушду тараққиёти мамлакатамон истифода намоем.

   Мутаассифона, ҳоло ҳам андешаҳои худшиносии миллӣ дар шуури баъзе аъзои ҷомеа ба қадри зарурӣ мавҷуд набуда, қатъи назар аз он ки ақидаҳои носолими чунин шахсонро ҷомеа қабул надорад, вале онҳо бо суиистифода аз фазои озоди демократии дар мамлакатамон бавуҷудомада, ба амалҳои зиддиқонунӣ даст мезананд.

   Ҳодисаҳои вақтҳои охир дар баъзе минтақаҳои ҷумҳурӣ далели онанд, ки имрӯз ҳам душманони миллати тоҷик дар либоси экстремизму терроризм ва дар шакли ниҳоду ташкилотҳо ва ҷараёнҳои гуногуни сиёсӣ, мазҳабӣ, динӣ дар байни мардум тухми иғво кошта, сулҳу суботи кишварро халалдор карданӣ ҳастанд. Аз ин хотир, дар чунин шароити тақдирсоз мо ҳамагон бояд ба ақлу хирад такя намуда, ҳушёрию зиракии сиёсӣ нишон дода, ба ҳеҷ ваҷҳ ба доми бадхоҳону душманони халқу кишвар афтодани шаҳрвандони алоҳидаро роҳ надиҳем.

   Баҳри ҳифзи ваҳдати миллӣ, Истиқлоли давлатӣ, таҳким ва рушди ҳокимияти сиёсӣ чунин падидаҳои номатлубро, ки душмани ваҳдати миллианд, дар ҳама соҳаҳои ҳаёти ҷомеа бояд рафъ намоем. 

   Сиёсати пайгиронаи Пешвои миллат, ки баҳри татбиқи он мо, ҳамагон, масъулем, дар ҳама соҳаҳои пешбурди ҳаёти кишвар тадриҷан шароити арзандаро барои инкишофи озодона ва роҳандозии потенсиали ҳар як аъзои ҷомеа таъмин месозад. Аммо, тавре воқеияти зиндагӣ шаҳодат медиҳад, ин тинҷию пешрафти давлати соҳибистиқлоламон то ба ҳол баъзе қувваҳоро дар хориҷ ва дохили кишвар ором намегузорад ва онҳо аз паи халалдор кардани авзои сиёсию иҷтимоӣ дар кишвар мебошанд.

   Мо, ки дар фазои Истиқлоли давлатӣ зиндагӣ дорем, бо тамоми вуҷудамон бояд масъулият эҳсос намоем ва ифтихор дошта бошем, ки соҳиби Ватан ҳастем. Ин бахт ба ҳар миллат ва халқ муяссар намешавад. Ҳамчун соҳибватан ба ҳифзи он, сарбаландӣ, обрӯю эътибор ва ободию зебоии он кӯшиш кунем ва шоистаю сазовори номи тоҷикистонӣ буданро дошта бошем! Ин маъсулият ва қарзи шаҳрвандӣ ва ватандории ҳар яки мо дар назди наслҳои имрӯз ва фардо хоҳад буд!

 

   Бигзор сулҳу оромӣ, дӯстиву ҳамдигарфаҳмӣ ва Ваҳдати миллӣ ҳамеша пойдор бошад ва Тоҷикистони маҳбуби мо зери осмони софу беғубор роҳи пешрафту шукуфоиро идома диҳад.

 

   Рӯзи Ваҳдати миллӣ муборак, ҳамватанони азиз!