ПАЁМИ ШОДБОШИИ
Директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон муҳтарам Раҳмон Исломиддин Хайриддин ба муносибати Рӯзи Ғалаба дар Ҷанги Бузурги Ватанӣ (солҳои 1941-1945)
Бо ифтихору сарфарозӣ, посдорӣ аз хотираи неки фарзандони Тоҷикистон ва қаҳрамонию корнамоиҳои онҳо дар мубориза бо фашизми гитлерӣ мо имрӯз 81-солагии пирӯзию зафар дар Ҷанги Бузурги Ватаниро таҷлил менамоем.
Ба ин муносибат, иштирокчиёни ин набард, собиқадорони меҳнат, шахсоне, ки дар он давраи вазнин дар ақибгоҳ заҳмат кашидаанд ва кулли мардуми шарафёри кишварро сидқан табрику шодбош гуфта, бароятон саломатии комил, умри дарози бобаракат, саодати рӯзгор ва хушиҳои зиндагиро таманно дорам.
Тавре ба ҳамагон маълум аст, Ҷанги дуюми ҷаҳон дар таърихи башарият аз лиҳози миқёс ва фоҷиаи инсонӣ ҷанги даҳшатноктарин ба ҳисоб меравад. Зеро зиёда аз 70 кишвари дунё ба гирдоби ҷанг кашида шуда, дар он беш аз 55 миллион нафар одамон қурбон шудаанд. Ҳазорҳо шаҳру ноҳия, деҳаю маҳалла, кӯчаву хиёбон вайрону ба харобазор табдил ёфта, несту нобуд шудаанд.
Дар ин зимн, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид доштанд, ки: «Наслҳои имрӯзу оянда бояд ҳамеша дар хотир дошта бошанд, ки маҳз дӯстиву бародарӣ ва ҳамёриву дастгирии миллатҳои гуногуни собиқ Иттиҳоди Шуравӣ омили асосии шикасти истилогарон ва пешгирӣ аз доман паҳн кардани «вабои фашизм» дар асри бистум гардид. Мо, ҳамчунин, бояд ҳамеша бо ифтихор хотирнишон созем, ки барои расидан ба ин пирӯзӣ дар баробари дигар миллатҳое, ки бар зидди истибдоди фашистӣ мубориза бурдаанд, мардону занони бонангу номуси Тоҷикистон низ саҳми муассиру сазовор гузоштаанд».
Воқеан, гарчанде майдони набардҳои хунин аз Тоҷикистон ҳазорҳо фарсах дур буд, вале акси садои он дар саросари диёри мо ба гӯш мерасид ва ҳар хонадони тоҷик гирифтори фоҷиаҳои он буд. Дар шаҳру ноҳияҳо ва ҳатто дар дурдасттарин деҳоти кишвари мо оилае набуд, ки падар, бародар, фарзанд ё хешу табори наздикашро ба хотири мубориза бар зидди истилогарон ба майдони ҷанг гусел накарда бошад.
Ин ҷанги даҳшатнокро сиёҳтарину пурғамтарин саҳифаи таърих ва фоҷиаи бузург барои миллати худ низ меҳисобем. Зеро аз 1,5 миллион нафар аҳолии кишвар дар он замон зиёда аз 300 ҳазор нафар ба майдони ҷанг сафарбар шуда, беш аз 100 ҳазори онҳо қурбон шуданд, зиёда аз 40 ҳазор беному нишон гардиданд ва 60 ҳазори дигар аз ҷанг бо маъюбият баргаштанд.
Ин ҳама ҷоннисориҳо, ки дар таърихи муосири халқи тоҷик абадан сабт гардидаанд, саҳми миллати тоҷикро дар ин ғалабаи бузург ва таъмини сулҳу амнияти ҷаҳонӣ таҷассум мекунанд.
Мардуми хушиқболи тоҷик бояд фаромӯш насозанд, ки фазои орому осудаи имрӯзаи кишвар бо нархи бисёр гарон ба даст омадааст ва ҳифзу ҳимояи он ҳамчун вазифаи пурмасъулу бошараф ба зиммаи ҳар яки мо - ҳам хизматчиёни давлатӣ, ҳам хизматчиёни ҳарбӣ ва ҳам аҳли ҷомеа вогузор шудааст. Зеро ҳифзи Ватан, ҳимояи ҳаёти осудаи мардум ва таҳкими сулҳу дӯстӣ дар ҳама давру замон барои ҳар як шаҳрванди худогоҳу хештаншинос ва ҷавонмардони бедордили миллат вазифаи муқаддас ва пуршараф ба шумор меравад.
Дар робита ба ин, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чунин андешаронӣ кардаанд: «Бовар дорам, ки мардуми сулҳпарвари тоҷик бо шукргузорӣ аз истиқлолу озодӣ, соҳибватаниву соҳибдавлатӣ ва суботи комили кишварамон минбаъд низ барои ҳифзу гиромидошти ин неъматҳои бузург ва ба хотири наслҳои ояндаи халқамон саъю талоши бештар мекунанд».
Бо ин таманнои нек, бори дигар, кулли мардуми сарбаланди тоҷикро бо Рӯзи Ғалаба дар Ҷанги Бузурги Ватанӣ табрику таҳният гуфта, ба ҳамаи шумо тансиҳативу хушбахтӣ, рӯзгори ободу осуда, тинҷию амонӣ ва ба Тоҷикистони азизамон ваҳдати пойдору осмони софу беғубор орзу дорам.
Ҷашни ғалаба муборак, ҳамдиёрони гиромӣ!
