Қабули Конститутсияи Ҷумҳурии Тоҷикистон 6-уми ноябри соли 1994 яке аз рӯйдодҳои муҳим ва сарнавиштсоз дар таърихи навини кишвари соҳибистиқлоламон ба шумор меравад. Ин санади олии ҳуқуқӣ ҳамчун пояи устувори давлатдорӣ, кафолати озодиву истиқлол ва ваҳдати миллӣ хизмат менамояд.
Бо эҳсоси ифтихори миллӣ ва самимияти бепоён 31-солагии Рӯзи Конститутсияи Ҷумҳурии Тоҷикистон - санади муқаддасу тақдирсози давлатдории миллиро табрику муборакбод гуфта, таманнои онро дорам, ки партави анвори ин санади муқаддас - Конститутсия ба кишвари мо боз ҳам шукуфоию пешравии ҳамаҷониба ва ба мардуми шарифи Тоҷикистон саодату пирӯзии комил оварад!
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо таъкид намудаанд, ки Конститутсия ифодаи равшани орзую ормонҳои халқи тоҷик, рамзи ваҳдат, сулҳ ва суботи давлат мебошад. Маҳз дар партави меъёрҳои ин санади олӣ, Тоҷикистон тавонист пас аз давраи пурошӯби ҷанги шаҳрвандӣ, роҳи сулҳ, ваҳдат ва пешрафтро интихоб намуда, дар муҳити оромиву субот ба сӯйи рушди устувор қадамҳои устувор гузорад.
Конститутсия ҷавҳари арзишҳои миллию умумибашарӣ буда, ҳуқуқу озодиҳои инсон ва шаҳрвандро эътироф ва ҳифз менамояд, сохтори сиёсӣ ва идоракунии давлатро муайян карда, самтҳои асосии сиёсати дохилӣ ва хориҷии кишварро танзим менамояд. Бо қабули он марҳалаи тозаи давлатсозии навини тоҷикон оғоз гардид.
Маҳз дар асоси Конститутсия, ки бо иродаи озоди мардум қабул шуд, Ҷумҳурии Тоҷикистон ҳамчун давлати демократӣ, ҳуқуқбунёд, дунявӣ ва иҷтимоӣ дар арсаи ҷаҳонӣ эътироф ёфт. Дар давоми 31 соли сипаришуда, меъёрҳои ин санади муқаддас ба пояи қонунгузорӣ, сиёсат ва зиндагии ҳаррӯзаи ҷомеа табдил ёфта, бо ҳидояти хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон халқи Тоҷикистон бо эҳтиром гузоштан ба озодӣ, ба ҳуқуқи инсон ва шаҳрванд, ба арзишҳои аслии башарӣ ва ба бунёди давлати соҳибихтиёр, демокративу ҳуқуқбунёд марҳилаи тозаи қонунгузориро дар қаламрави кишвари худ асос гузошт.
Бо ифтихор метавон гуфт, ки меъёрҳои Конститутсияи Ҷумҳурии Тоҷикистон дар тамоми соҳаҳои ҳаёти ҷомеа татбиқ гардида, заминаи устувори рушди иқтисодӣ, иҷтимоӣ ва фарҳангии кишварро фароҳам овардаанд. Барномаҳои бузурги давлатӣ - аз эҳёи деҳот то рушди саноату энергетика, аз таъмини амнияти озуқаворӣ то рушди илм ва рақамикунонии иқтисод - маҳз дар доираи сиёсати конститутсионӣ амалӣ мегарданд.
Ҳамзамон, Конститутсия ҳамчун санади асосӣ ва ҷавобгӯ ба талаботи замон, дар давраҳои муайян бо тағйиру иловаҳои зарурӣ такмил дода шуд, то ки ҷавобгӯи воқеияти рушди босуръати кишвар бошад. Ин раванд далели возеҳи эҳтиром ва масъулияти баланди давлат ва ҷомеа нисбат ба сарнавишти Ватан ва ояндаи наслҳои нав мебошад.
Имрӯз, вақте ки мо ба сӯйи марҳалаи нави рушди давлатдорӣ қадам мегузорем, муҳим аст, ки мавқеъ ва аҳамияти Конститутсияро дар тамоми самтҳои фаъолияти худ эҳсос намоем. Эҳтиром ва риояи қонун, масъулиятшиносӣ дар назди давлат ва ҷомеа, хизмат ба Ватан ва мардум - ин ҳама аз фарҳанги конститутсионии ҳар як шаҳрванди кишвар сарчашма мегирад.
Аз ин рӯ, ҳоло аз ҳар яки мо тақозо мешавад, ки ба манфиати Ватан, давлат ва халқи худ софдилонаву содиқона кору зиндагӣ карда, тамоми кӯшишу ғайрати худро барои пешрафти давлати мустақили тоҷикон, таҳкими минбаъдаи мавқеъ ва эътибори Ватани азизамон дар арсаи байналмилалӣ, равона созем.
Шукрона мекунем, ки имрӯз Ватани маҳбубамон - Тоҷикистон ба шарофати соҳибистиқлолӣ ва риояи меъёрҳои Конститутсия рӯз ба рӯз зебову шукуфон мегардад ва мардум дар фазои сулҳу субот кору зиндагӣ доранд. Набояд фаромӯш сохт, ки яке аз талаботи муҳими Конститутсия эҳтиром, риоя ва иҷрои ҳатмии меъёрҳои он ва қонунҳои амалкунанда мебошад. Барои ноил гардидан ба ин ҳадаф ҳар як нафар дар ҷомеа бояд саъю талош намояд, бо рафтору гуфтору пиндори некаш намунаи ибрати дигарон бошад.
Ба ин муносибати фархунда бори дигар тамоми ҳамватанон, ҳамкорон ва дӯстдорони Ватанро бо 31-солагии Рӯзи Конститутсияи Ҷумҳурии Тоҷикистон самимона табрик гуфта, ба ҳар як хонавода осоишу саломатӣ, ризқи фаровон, бахту иқбол, саодати рӯзгор ва комёбиҳои нав ба навро орзумандам.
Бигзор Конститутсия ҳамеша роҳнамои пешрафту муваффақияти давлати соҳибистиқлоламон гардад!
