Ҷаласаи васеи Раёсати Академияи илмҳои кишоварзии Тоҷикистон оид ба ҷамъбасти фаъолияти муассисаҳои илмии АИКТ дар шаш моҳи соли 2026

Ба ҳайати Академия 9 нафар академик, 5 нафар аъзои вобаста ва 2 нафар аъзои хориҷӣ шомил мебошанд. Дар ин давра ба муассисаҳои илмии Академия 78 нафар корманди нав аз ҷумла 2 нафар доктори илм, 7 нафар номзади илм ва 69 нафар дигар кормандон қабул гардиданд.

Айни замон дар муассисаҳои илмии Академия корҳои илмию тадқиқотӣ аз рӯи 55 мавзуи фармоишӣ, 3 лоиҳаи Фонди Президентии тадқиқоти бунёдӣ ва 6 барномаи байналмилалӣ амалӣ мегарданд.

Дар давраи ҳисоботӣ олимони муассисаҳои илмии Академия барои дастовардҳои илмӣ ва татбиқи онҳо дар истеҳсолот соҳиби 7 нахустпатент, 40 шаҳодатномаи муаллифӣ оид ба ихтироъ, 3 қарор дар бораи додани нахустпатент гардида, 1 арзнома барои гирифтани нахустпатент пешниҳод карда, 3 шаҳодатномаи сифати тухмии зироатҳои кишоварзӣ ба даст оварданд. Ҳамзамон, 1 навъи ангур барои омӯзиш ва гузаштан аз санҷиши давлатӣ ба Комиссияи давлатии озмоиши навъи зироатҳои кишоварзӣ пешниҳод карда шуд.

Дар самти селексияи пахтаи миёнанах 70 навъу намунаи коллексионӣ, 35 навъи волидайнӣ, 23 дурагаи комбинатсионӣ ва 257 оилаи селексионӣ, дар парваришгоҳҳои тухмипарварии ибтидоӣ 22 навъи ватанию хориҷӣ, дар парваришгоҳи тухмипарварии соли якум 550 оила, дар парваришгоҳи тухмипарварии соли дуюм 110 оила ва дар парваришгоҳи тухмизиёдкунӣ 77 оилаи навъҳои пахтаи миёнанахи ноҳиябандишуда ва ояндадор мавриди омӯзиш қарор дода шуд.

Бо мақсади тайёр намудани кадрҳои илмӣ дар бахшҳои магистратура 84 нафар, докторантура (PhD) – 49, аспирантура – 25 ва унвонҷӯй 20 нафар ба таҳсил фаро гирифта шуда буданд, ки 38 нафар магистр, 24 нафар докторант (PhD) ва 5 нафар унвонҷӯй таҳсилро хатм намуданд.

Дар самти тайёр кардани кадрҳои илмӣ дар назди шуроҳои диссертатсионии назди Академия дар нимсолаи якуми соли ҷорӣ 1 рисолаи докторӣ, 3 рисолаи номзадӣ ва 5 рисолаи доктори фалсафа (PhD) аз рӯйи ихтисос ҳимоя гардиданд.

Дар давраи ҳисоботӣ олимони муассисаҳои илмии Академия 354 кори илмӣ, аз ҷумла 3 маҷалла, 4 китоб, 8 китобча, 2 дастур, 21 тавсиянома, 12 буклет ва 304 мақолаи илмиро ба нашр расониданд.

Ҳамзамон, 45 чорабинии илмӣ, аз ҷумла 3 конференсияи байналмилалӣ, 1 конференсияи ҷумҳуриявӣ, 18 семинари минтақавӣ, 16 рӯзи саҳроӣ, 2 рӯзи фермерӣ ва 5 мизи мудаввар баргузор гардида тавассути шабакаҳои телевизионӣ 382 маротиба ва радио 47 маротиба бо тавсияҳо баромадҳо намуда, дар нашрияҳои расмӣ 7 мақолаи илмию оммавӣ ба нашр расониданд.

Олимони муассисаҳои илмии Академия дар кори зиёда аз 300 конференсия, семинарҳои илмию амалӣ, симпозиум ва форумҳои сатҳи байналмилалӣ, ҷумҳуриявӣ ва минтақавӣ фаъолона иштирок ва баромад намуданд.

Соли ҷорӣ дар асоси амри Президенти Ҷумҳурии Тоҷикистон аз 17-уми марти соли 2026 ва фармоиши президенти Академияи илмҳои кишоварзии Тоҷикистон аз 6.01.2026 дар муассисаҳои илмии АИКТ озмуни ҷумҳуриявии «Фурӯғи субҳи доноӣ китоб аст» ва озмуни ҷумҳуриявии «Илм-фурӯғи маърифат» гузаронида шуд. Дар ин озмунҳо 14 нафар дар даври ноҳиявӣ иштирок намуда, дар озмуни ҷумҳуриявии «Фурӯғи субҳи донои китоб аст» як нафар сазовори ҷои дуюм ва дар озмуни ҷумҳуриявии «Илм - фурӯғи маърифат» 2 нафар сазовори ҷойҳои 1-ум ва 2-юм гардида, ба даври шаҳрӣ роҳ ёфтанд.

Раёсат ва олимони муассисаҳои илмии Академияи илмҳои кишоварзии Тоҷикистон аз тамоми захираву имкониятҳои мавҷуда самаранок истифода бурда, кушиш ба харҷ медиҳанд, ки ҷиҳати иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки дар Паёми имсолаашон ба Маҷлиси Олии Ҷумҳурии Тоҷикистон (16.12.2025) ва зимни сафарҳои корӣ ба шаҳру ноҳияҳои ҷумҳурӣ баён гардидаанд, инчунин татбиқи барномаҳои давлатии рушди соҳаҳои кишоварзӣ чораҳои зарурӣ андешида, тадқиқотро дар самти офаридани зироатҳои кишоварзӣ ва дарахтони мевадиҳанда мутобиқ ба тағйирёбии иқлим, такмили технологияи парварши зироату чорвои кишоварзӣ ва рақамикунонии соҳаи кишоварзӣ густариш дода, дар таъмини амнияти озуқавории мамлакат саҳми арзанда гузоранд.

Дар муҳокимаи масъалаи мазкур Сардори Раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон Салимзода Салим Зоир, муовини Вазири кишоварзии Ҷумҳурии Тоҷикистон муҳтарам Аҳмадзода Баҳром, ректори Донишгоҳи аграрии Тоҷикистон ба номи Ш. Шоҳтемур Маҳмадёрзода Усмон, директорони муассисаҳои илмӣ баромад намуда, фаъолияти Академияро дар шаш моҳи соли ҷорӣ мусбат арзёбӣ намуданд.

Дар ҷамъбасти масъала президенти АИКТ, аъзои вобастаи АИКТ, доктори илмҳои кишоварзӣ, профессор Салимзода Амонулло Файзулло баромад намуда, иброз доштанд, ки ҷиҳати ба роҳ мондани корҳои ободониву созандагӣ ҷиҳати дар сатҳи баланд ва бо шукӯҳу шаҳомат истиқбол гирифтани ҷашни 35-солагии Истиқлолияти давлатии Ҷумҳурии Тоҷикистон, дар асоси дастури шифоии Роҳбари давлат дар доираи сафари корӣ ба шаҳру ноҳияҳои вилояти Суғд дар ноҳияи Деваштич, ҷиҳати зиёд намудани истеҳсоли маҳсулоти кишоварзӣ аз ҳисоби кишти зироатҳои кишоварзӣ дар майдони боѓҳои ҷавон вобаста ба минтақаҳои ҷумҳурӣ пешниҳодҳои мушаххаси илмӣ намудан, ҳамзамон ҷиҳати пешниҳоди дастуру тавсияҳо ва расонидани ёрии машваратию амалӣ ба хоҷагиҳои кишоварзӣ дар самти технологияи бунёди боғҳои интенсивӣ ва суперинтенсивӣ, зиёд намудани масоҳати гармхонаҳои доимоамалкунанда ва татбиқи технологияҳои инноватсионӣ барои парвариши зироатҳои кишоварзӣ чораҳои зарурӣ андешида, ҷалби ҷавонони лаёқатмандро ба корҳои илмию тадқиқотӣ, таҳсил дар магистратура, аспирантура, докторантура ва дифои рисолаҳои номзадӣ, докторӣ ва доктор (PhD) таъмин намоянд.

Аз рӯи баромаду муҳокимаи баромадкунандагон ва пешниҳодҳо ҷаласаи Раёсат қарори дахлдор қабул кард.