26 августи соли 2025 Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода ҳайати губернатории вилояти Томски Федератсияи Россияро таҳти роҳбарии муовини губернатори вилояти Томск оид ба сиёсати иҷтимоӣ - Грузных Светлана Николаевна, ки бо мақсади шиносоӣ бо фаъолияти ниҳодҳои давлатии Ҷумҳурии Тоҷикистон дар самти муҳоҷирати меҳнатӣ ва ба роҳ мондани ҳамкориҳои минбаъда бо муассисаҳои ваколатдори Тоҷикистон, ки ба ҷалби муташаккилонаи шаҳрвандони Ҷумҳурии Тоҷикистон барои амалӣ намудани фаъолияти меҳнатии муваққатӣ дар ҳудуди Федератсияи Россия машғуланд, ба Ҷумҳурии Тоҷикистон ташриф овардаанд, ба ҳузур пазируфт.
Зимни вохўрӣ ҷонибҳо вазъи кунунӣ ва дурнамои ҳамкориҳоро оид ба ҷалби муташаккиллонаи шаҳрвандони Ҷумҳурии Тоҷикистон барои фаъолияти меҳнатии муваққатӣ дар Федератсияи Россия баррасӣ карда, оид ба идоракунии раванди муҳоҷират, таъмини муҳоҷирати қонунӣ, ботартиб ва бехатар дар давлати қабулкунандаи қувваи корӣ, риояи қонунгузорӣ ва тартиби будубош, маҳдудиятҳои ҷорӣ барои шаҳрвандони хориҷӣ дар Федератсияи Россия, ки муҳоҷирони меҳнатӣ ҳангоми амалӣ намудани фаъолияти меҳнатӣ ба мушкилӣ дучор мегарданд, мубодилаи афкор намуданд.
Ҷонибҳо ба масъалаҳои шарту шароити будубош ва мутобиқшавии шаҳрвандони Тоҷикистон дар ин минтақа, омўзишӣ забони русӣ, навовариҳо дар соҳаи маориф, суѓуртаи тиббӣ, таълими калонсолон тариқи фосилавӣ ва азнавсозии марказҳои шуѓл таваҷҷуҳи махсус зоҳир намуда, ҳайати Томск омодагии худро барои таҳкими ҳамкории минбаъда ҷиҳати таъсис додани маркази тестӣ барои санҷиши забони русӣ дар Ҷумҳурии Тоҷикистон, ташкили ҷойҳои корӣ ба донишҷӯён аз муассисаҳои тиббӣ дар давоми таътил ва ҷалби донишҷӯён ба муассисаҳои таҳсилоти олии вилояти Томск барои гирифтани маълумоти босифат изҳор кард.
Дар охир муовини губернатори вилояти Томск ҳайати Вазорати меҳнат, муҳоҷират ва шуғли аҳолии Ҷумҳурии Тоҷикистонро барои амалӣ намудани мувофиқаи бадастомада ва баррасии ташаббусҳои пешбинишуда ба вилояти Томск даъват намуд. Ҳамзамон, ҷаласаи роҳбарияти сохторҳои низоми вазорат бо ҳайати мазкур оид ба пешниҳоди имкониятҳо баргузор гардида, маълумотҳо тариқи рунамо пешниҳод ва барои роҳандозии ҳамкориҳои минбаъда мубодилаи афкор сурат гирифт.
