Бо ибтикори Хадамоти иҷрои назди Ҳукумати Ҷумҳурии Тоҷикистон санаи 19 ноябри соли равон дар шаҳри Хуҷанд семинар - машварати омӯзишӣ дар мавзӯи “Такмили малакаи касбии кормандони мақомоти иҷро дар самти равандҳои рақамикунонӣ” баргузор гардид, ки дар он иҷрочиён ва масъулони мақомоти иҷро иштирок намуданд.
Баргузории семинарҳо ва машваратҳои омӯзишӣ барои баланд бардоштани сатҳи донишу малакаи кормандон нақши калидӣ дошта, ба рушди касбият ва болоравии самаранокии фаъолияти хизматӣ мусоидат менамоянд.
Дар шароити имрӯза, ки раванди рақамикунонии идоракунӣ ва хизматрасонӣ бо суръат рушд меёбад, аз кормандони давлатӣ талаб карда мешавад, ки истифодаи технологияҳои муосирро дуруст ба роҳ монда, қобилияти кор бо низомҳои электронӣ ва воситаҳои рақамиро такмил диҳанд.
Ҳадафи асосии баргузории семинар таҳкими донишҳои иҷрочиён оид ба ҷорикунии технологияҳои рақамӣ дар фаъолияти ҳаррӯза, омӯзиши таҷрибаи муосир ва муайян намудани мушкилиҳои амалии мавҷуда мебошад.
Дар ҷараёни чорабинӣ мутахассисони соҳа роҷеъ ба мавзуъҳои муҳимми марбут ба татбиқи системаҳои электронии идоракунӣ, ҳифзи маълумоти корӣ ва тартиби кор бо платформаҳои рақамӣ маълумот дода, масъалаҳои соҳавии ҷойдоштаро баррасӣ намуданд.
