Бо ташаббуси Хадамоти иҷрои назди Ҳукумати Ҷумҳурии Тоҷикистон санаи 16 октябри соли равон, бо иштироки иҷрочиён ва масъулини мақомоти иҷро дар шаҳру ноҳияҳои вилояти Хатлон зердаври дуюми даври якуми озмуни ҷумҳуриявии «Иҷрочии беҳтарини сол» дар соли 2025 баргузор гардид.
Мақсад аз баргузории озмуни мазкур баланд бардоштани сифатнокии фаъолияти хизматӣ, такмили маҳорати касбии иҷрочиён, густариши донишҳои ҳуқуқӣ ва соҳавӣ, инчунин муайян ва ҳавасманд намудант кормандоне, ки фаъолияти дурусту босамарро баҳри татбиқи амалии сиёсати давлатӣ дар соҳаи истеҳсолоти иҷро ба роҳ мондаанд, ба шумор меравад.
Дар даври якуми озмун, ки аз се марҳила иборат мебошад, комиссияи минтақавӣ сатҳи дониши касбии иҷрочиёнро тавассути иҷрои саволномаи тестии соҳавӣ, ки дар асоси қонунгузории амалкунандаи соҳаи истеҳсолоти иҷро таҳия шудааст, мавриди санҷиш қарор медиҳанд.
Дар даври дуюми озмун, дар якҷоягӣ бо санҷиши донишҳои назариявии иҷрочиёни ғолиби даври якум, ҷанбаъҳои зерин низ мавриди баҳогузорӣ қарор хоҳанд гирифт:
- донишҳои соҳавиву касбии иҷрочиёни мақомот;
- фоизи иҷрои ҳуҷҷатҳои иҷро (бо диққати махсус ба парвандаҳои вобаста ба алимент);
- фоизи маблағҳои ситонидашуда (аз ҷумла, ба манфиати давлат);
- андозаи пардохтҳои иҷро, дараҷаи риояи интизоми меҳнат ва дигар масъалаҳо.
Лозим ба зикр аст, ки аз натиҷаи баргузории даври якуми озмун (се зердавр) 3 нафар иҷрочиёне, ки холҳои аз ҳама баландро ба даст меоранд, ба даври дуюми озмун, яъне даври ҷумҳуриявӣ роҳхат мегиранд.
Ғолибони озмун аз ҷониби Хадамоти иҷро мутобиқи тартиби муқарраршуда бо ҷоизаҳо, аз ҷумла ҷоми ифтихорӣ, сипоснома, ифтихорнома, мукофотҳои пулӣ ва молӣ, ҳамчунин дигар туҳфаҳои арзишманд қадрдонӣ карда мешаванд.
