13 декабри соли 2025 дар шаҳри Пекин, дар Донишгоҳи забон ва фарҳанги Пекин, Форуми байналмилалии илмӣ таҳти унвони «Истифодаи бартариҳои хоси Ҳонконг ва Макао дар мусоидат ба ҳамкориҳо дар доираи ташаббуси “Як камарбанд – як роҳ”» баргузор гардид.
Форуми мазкур бо ташаббуси Маркази тадқиқоти рушди Шӯрои давлатии Ҷумҳурии Мардумии Чин (Институти таҳқиқоти Ҳонконг ва Макао) ва Донишгоҳи забон ва фарҳанги Пекин ташкил гардида, дар он намояндагони мақомоти давлатӣ, муассисаҳои илмӣ-таҳқиқотӣ, донишгоҳҳо ва коршиносони маъруфи байналмилалӣ иштирок намуданд.
Дар кори форум намояндагони Вазорати адлияи Ҷумҳурии Тоҷикистон низ иштирок намуда, таҷрибаи Ҷумҳурии Тоҷикистонро дар самти ислоҳоти ҳуқуқӣ, ҳамкориҳои байналмилалӣ ва рушди низоми адлия дар шароити ҳамгироии минтақавӣ муаррифӣ карданд.
Дар ҷаласаи мавзӯии сеюм таҳти унвони «Нақши хизматрасониҳои ҳуқуқии Ҳонконг дар татбиқи ташаббуси “Як камарбанд – як роҳ”» Собирзода Исфандиёр Салом, ректори Донишкадаи такмили ихтисоси Вазорати адлияи Ҷумҳурии Тоҷикистон, номзади илмҳои ҳуқуқшиносӣ, дотсент, бо маърӯза дар мавзӯи «Нақши Тоҷикистон ва низоми ҳуқуқии он дар таҳкими ҳамкориҳои минтақавӣ дар доираи ташаббуси “Як камарбанд – як роҳ”» баромад намуд.
Дар маърӯза масъалаҳои ҳамкории ҳуқуқӣ, хизматрасониҳои адлия, омодасозии кадрҳои ҳуқуқшинос, инчунин истифодаи таҷрибаи Ҳонконг дар соҳаҳои ҳуқуқи байналмилалӣ, арбитражи байналмилалӣ ва ҳифзи ҳуқуқи сармоягузорон мавриди таҳлил қарор дода шуданд.
Зикр гардид, ки Ҷумҳурии Тоҷикистон ҳамчун кишвари фаъоли минтақа ба рушди ҳамкориҳои ҳуқуқӣ дар доираи ташаббуси “Як камарбанд – як роҳ” таваҷҷуҳи хос зоҳир намуда, истифодаи таҷрибаи пешқадами Ҳонконг ва Макао метавонад ба таҳкими низоми ҳуқуқӣ ва рушди ҳамкориҳои байналмилалӣ мусоидат намояд.
Иштироки намояндагони Вазорати адлияи Ҷумҳурии Тоҷикистон дар чунин ҳамоишҳои байналмилалӣ ба таҳкими робитаҳои илмӣ ва амалӣ, мубодилаи таҷриба ва рушди ҳамкориҳои ҳуқуқии байналмилалӣ мусоидат менамояд.
