9 марти соли 2026 ҳайати Ҷумҳурии Тоҷикистон таҳти роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода дар маросими ифтитоҳи ҷаласаи 70-уми Комиссияи СММ оид ба мақоми зан (CSW-70), ки дар қароргоҳи…
9 марти соли 2026 ҳайати Ҷумҳурии Тоҷикистон таҳти роҳбарии Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода дар маросими ифтитоҳи ҷаласаи 70-уми Комиссияи СММ оид ба мақоми зан (CSW-70), ки дар қароргоҳи СММ дар шаҳри Ню-Йорк баргузор гардид, иштирок намуд.
Ҷаласаи 70-уми Комиссияи СММ оид ба мақоми зан ба баррасии масоили таъмин ва таҳкими дастрасӣ ба адолати судӣ барои ҳамаи занон ва духтарон, аз ҷумла тавассути пешбурди низомҳои фарогир ва одилонаи ҳуқуқӣ, аз байн бурдани амалияҳои табъизомез, инчунин бартараф намудани монеаҳои сохторӣ тамаркуз хоҳад кард.
Ҷаласаи 70-уми Комиссияи СММ оид ба мақоми зан 9 март оғоз гардида то 19 март идома меёбад.
10 март дар доираи сафари ҳайати Тоҷикистон ба Ню Йорк ҷиҳати иштирок дар ҷаласаи 70-уми Комиссияи СММ оид ба мақоми зан Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода бо занону духтарони тоҷики муқими Ню Йорк мулоқот намуд.
Раиси Кумита таъкид намуд, ки ба шарофати сиёсати хирадмандонаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масъалаи баланд бардоштани мақоми зан дар ҷомеа яке аз самтҳои муҳими сиёсати давлатии кишвари мо ба ҳисоб меравад.
Дар ин замина барои фароҳам овардани шароити мусоид ҷиҳати иштироки фаъолонаи занон дар идоракунии давлатӣ, соҳибкорӣ, илм, маориф ва дигар бахшҳои ҳаёти ҷомеа тадбирҳои мушаххас амалӣ гардида истодаанд.
Ҳамчунин қайд гардид, ки бонувони тоҷик, новобаста аз макони зист, метавонанд бо ташаббус ва фаъолияти созандаи худ дар муаррифии фарҳанг, арзишҳои миллӣ ва дастовардҳои Тоҷикистон саҳми назаррас гузоранд.
