Санаи 18 май, дар асоси нақшаи чорабиниҳои муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон ва Кумитаи таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон…
Санаи 18 май, дар асоси нақшаи чорабиниҳои муштараки Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Вазорати маориф ва илми Ҷумҳурии Тоҷикистон ва Кумитаи таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон бахшида ба Рӯзи ҷавонони Тоҷикистон дар Донишгоҳи давлатии тиббии Тоҷикистон ба номи Абӯалӣ Ибни Сино чорабинии сиёсӣ-фарҳангӣ баргузор гардид.
Дар чорабинии мазкур муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Чоршанбезода Сураҷ Сайнак ва ректори Донишгоҳи давлатии тиббии Тоҷикистон ба номи Абӯалӣ Ибни Сино Муҳиддин Нуриддин Давлаталӣ иштирок ва суханронӣ намуданд.
Зимни суханронӣ таъкид гардид, ки ҳамасола Рӯзи ҷавонони Тоҷикистон дар фазои сулҳу субот, дӯстӣ ва муҳаббат ба Ватан бо ташкили чорабиниҳои гуногуни варзишӣ, фарҳангӣ, илмию маърифатӣ ва сиёсӣ бо шукуҳу шаҳомати хосса таҷлил карда мешавад.
Қайд гардид, ки Ҳукумати Ҷумҳурии Тоҷикистон таҳти роҳбарии Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон барои тарбияи насли ояндасоз, ватандӯст ва соҳибмаърифат тамоми шароити заруриро фароҳам овардааст. Пешвои миллат сиёсати давлатии ҷавононро яке аз самтҳои афзалиятноки сиёсати давлатӣ арзёбӣ намуда, ҳамеша нисбат ба ҷавонон таваҷҷуҳи махсус зоҳир менамоянд.
Ҳамзамон зикр карда шуд, ки ҷавонон ва донишҷӯён бояд бо аз худ намудани касбу ҳунарҳои замонавӣ, донишҳои муосир ва забонҳои хориҷӣ дар рушду пешрафти Тоҷикистони соҳибистиқлол саҳми арзандаи худро гузоранд.
Дар қисмати дигари чорабинӣ аз ҷониби роҳбарияти Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба як қатор донишҷӯёни фаъол барои иштироки фаъолона дар чорабиниҳои варзишӣ, фарҳангӣ ва илмию сиёсӣ сипосномаҳо тақдим карда шуданд.
Ҳамчунин, аз ҷониби роҳбарияти Донишгоҳи давлатии тиббии Тоҷикистон ба номи Абӯалӣ Ибни Сино ба ғолибон ва ҷоизадорони озмунҳо туҳфаҳои хотиравӣ ва сипосномаҳо супорида шуданд.
Дар фарҷоми чорабинӣ барномаи фарҳангӣ-фароғатӣ бо пешниҳоди суруду таронаҳои дилнишин ва рақсу оҳангҳои ҷолиб манзури ҳозирин гардонида шуд.
