Дар доираи сиёсати созандаи варзишпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкорони оилаи Иноятовҳо дар шаҳраки Суғдиёни ҷамоати деҳоти Косатароши шаҳри Панҷакент майдончаи муосири варзишии болопӯшида бо муосиртарин шароит баҳри рушд ва оммавигардонии футбол сохта шуда, дар арафаи Рӯзи варзишгарон мавриди истифода қарор дода шуд.
Дар маросими ифтитоҳи расмии майдончаи муосири варзишӣ Зулфиқор Гулаҳмадзода - Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Бахтиёр Исматзода - сардори раёсати кор бо ҷавонон ва варзиши вилояти Суғд ва Абдухолиқ Холиқзода - Раиси шаҳри Панҷакент иштирок ва суханронӣ намуда, ба ташаббускорону саҳмгузорон барои саҳм гузоштан дар оммавигардонии варзиш изҳори сипос намуданд.
Ҳамзамон, аз таваҷҷуҳ ва дастгириву ғамхориҳои доимии давлат ва Ҳукумати кишвар, хосса Президенти мамлакат, Пешвои миллат муҳтарам Эмомалӣ Раҳмон нисбат ба ин қишри ояндасози кишвар андешаронӣ намуданд.
Зимнан ба наврасону ҷавонон дар майдончаи навбунёд лавозимоти варзишӣ тӯҳфа гардид.
