Санаи 21 августи соли равон дар доираи сазовор таҷлил намудани 34 солагии Истиқлолияти давлатии Ҷумҳурии Тоҷикистон соати сиёсӣ дар мавзӯи “Истиқлолияти энергетикӣ” бо иштироки намояндаи ҲХДТ дар ноҳияи Исмоили Сомонии шаҳри Душанбе ва аъзоёни ташкилоти ибтидоии ҳизбии "Асрор" – и Саридораи Ҳифзи сирри давлатии назди Ҳукумати Ҷумҳурии Тоҷикистон баргузор гардид.
Дар чорабинии мазкур намояндаи Кумитаи иҷроияи ҲХДТ дар ноҳияи Исмоили Сомонӣ суханронӣ намуда, оид ба дастовардҳои бузурги Ҷумҳурии Тоҷикистон дар соҳаи энергетика, махсусан дар замони соҳибистиқлолӣ, ибрози андеша намуд.
Инчунин, зикр намуд, ки истиқлолияти энергетикӣ яке аз рукнҳои муҳимтарини амнияти миллӣ ва рушди иқтисодиёти кишвар маҳсуб меёбад. Дар ин росто, сохтмони Нерӯгоҳи барқи обии "Роғун" ҳамчун рамзи ирода ва худшиносии миллӣ арзёбӣ гардида, татбиқи муваффақонаи он заминаи устувор барои расидан ба ҳадафи чоруми стратегии кишвар — саноатикунонии босуръат мебошад.
Ҳамчунин, таъкид гардид, ки ҲХДТ ҳамчун ҳизби пешбари ҷомеа, ҷонибдори устувории энергетикӣ буда, пайваста ташаббусҳои созандаи давлат ва Ҳукумати Ҷумҳурии Тоҷикистонро дар ин самт дастгирӣ менамояд.
Дар ҷараёни вохӯрӣ иштирокчиён саволҳои марбут ба масъалаҳои энергетика ва нақши шаҳрвандон дар истифодаи самараноки энергияро пешниҳод намуда, посухҳои қонеъкунанда гирифтанд.
Масъалаҳои баланд бардоштани сатҳи маърифатнокии аҳолӣ оид ба сарфакорона истифода бурдани нерӯи барқ ва дигар манбаъҳои энергия низ мавриди муҳокима қарор гирифтанд.
Вохӯрии мазкур бо рӯҳияи баланди сиёсиву ватандӯстӣ баргузор гардида, дар самти баланд бардоштани ҷаҳонбинии сиёсии кормандони Саридораи Ҳифзи сирри давлатӣ ва таҳкими мавқеи ҲХДТ дар байни аъзоёни ташкилоти ибтидоии "Асрор" -и Саридора саҳми назаррас хоҳад гузошт.
