Фарҳанги муъминобод дар пойтахт: муаррифии ганҷинаҳои миллӣ дар арафаи 35-солагии истиқлол

Меҳмонон имкон пайдо намуданд, ки бо фарҳанги қадима, расму оинҳои мардумӣ, ҳунарҳои анъанавӣ ва имкониятҳои сайёҳии ноҳияи Муъминобод аз наздик шинос шаванд. Гӯшаҳои намоишӣ аз таъриху фарҳанги бой ва меҳнатдӯстии мардуми ноҳия шаҳодат дода, мавқеи Муъминободро ҳамчун яке аз минтақаҳои дорои захираҳои фаровони фарҳангӣ, сайёҳӣ ва иқтисодии мамлакат муаррифӣ намуданд.

 

Бахши дигари чорабинӣ ба барномаи фарҳангиву ҳунарӣ бахшида шуд. Дар он ҳунармандони ноҳияи Муъминобод бо сурудҳои ватандӯстона, рақсу таронаҳои мардумӣ, саҳнаҳои театришуда ва дигар барномаҳои ҷолиби фарҳангӣ ҳунарнамоӣ карда, ба чорабинӣ ҳусни идона бахшиданд.

Таъкид гардид, ки Муъминобод ҳамчун яке аз минтақаҳои дорои табиати нотакрор, таърихи пурғановат ва фарҳанги асили миллӣ дар ҳифзу рушди суннатҳои мардумӣ ва муаррифии арзишҳои фарҳангии тоҷикон саҳми арзанда дорад. Муаррифии чунин дастовардҳо дар пойтахт имконияти хубест барои шинос намудани сокинону меҳмонони Душанбе бо захираҳои фарҳангӣ, ҳунарӣ, сайёҳӣ ва иқтисодии ноҳия.

 

Ҳамзамон, дар ҷараёни чорабинӣ барои ҳамкориҳои судманд ва дар сатҳи баланди ташкилӣ баргузор намудани Рӯзи фарҳанги ноҳияи Муъминобод ба масъулон сипосномаву ифтихорномаҳо тақдим карда шуд. Ин иқдом ҳамчун нишонаи қадрдонӣ аз саҳми ташкилкунандагон, кормандони соҳаи фарҳанг, ҳунармандон ва дигар фаъолони чорабинӣ арзёбӣ гардид.

 

Рӯзи фарҳанги ноҳияи Муъминобод дар фазои идона ва рӯҳияи баланди ватандӯстӣ баргузор гардида, баёнгари эҳтиром ба фарҳанги миллӣ, таҳкими ҳамбастагии ҷомеа, дӯстиву бародарӣ ва муаррифии дастовардҳои даврони соҳибистиқлолии кишвар гардид.

 

Баргузории чунин чорабиниҳои фарҳангӣ дар арафаи 35-солагии Истиқлоли давлатии Ҷумҳурии Тоҷикистон бозгӯи сиёсати фарҳангпарваронаи давлат ва таваҷҷуҳи пайваста ба ҳифзу эҳё ва рушди мероси фарҳангии миллӣ мебошад.