Рӯзҳои фарҳанги шаҳри Бохтар ва шукӯҳу шаҳомати он дар шаҳри Душанбе

Дар доираи чорабинӣ намоиши васеи дастовардҳои шаҳри Бохтар ташкил гардида, маҳсулоти кишоварзӣ, саноатӣ, ҳунарҳои мардумӣ, маҳсули фаъолияти соҳибкорон ва дигар имкониятҳои иқтисодиву фарҳангии шаҳр ба маърази тамошо гузошта шуданд.

 

Ҳамзамон, дастовардҳои шаҳри Бохтар дар даврони соҳибистиқлолӣ, аз ҷумла пешрафтҳо дар соҳаҳои иқтисод, иҷтимоиёт, маориф, тандурустӣ, фарҳанг ва варзиш, муваффақиятҳои варзишгарон дар мусобиқаҳои ҷумҳуриявию байналмилалӣ, иштироку дастовардҳои намояндагони шаҳр дар озмунҳои ҷумҳуриявӣ ва байналмилалӣ, инчунин корҳои созандагию ободонӣ, ки дар партави сиёсати бунёдкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардидаанд, таваҷҷуҳи меҳмонон ва ҳозиринро ба худ ҷалб намуданд.

 

Меҳмонон аз гӯшаҳои намоишгоҳ дидан намуда, ба сифати маҳсулоти пешниҳодшуда, ҳунари волои косибон ва дастовардҳои назарраси шаҳри Бохтар баҳои баланд доданд.

Дар қисмати фарҳангии чорабинӣ барномаи бошукӯҳи консертӣ бо иштироки ҳунармандони маъруфи кишвар пешкаши иштирокдорон гардида, суруду таронаҳои ватандӯстона, оҳангҳои дилнишин ва рақсҳои ҷаззоб ба маҳфил шукӯҳу шаҳомати тоза бахшида, фазои идонаро ҳукмфармо намуданд.

 

Баргузории Рӯзҳои фарҳанги шаҳри Бохтар бозгӯи рушди устувори шаҳр дар даврони соҳибистиқлолӣ буда, барои муаррифии имкониятҳои иқтисодиву фарҳангӣ, таҳкими дӯстиву ҳамдигарфаҳмӣ ва тарғиби арзишҳои миллӣ саҳми арзанда мегузорад.