Бо мақсади амалигардонии Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занону духтарони болаёқат барои солҳои 2023-2030 аз ҷониби Кумитаи кор бо занон ва оилаи назди Ҳукумати Ҷумҳурии Тоҷикистон соли севвум аст, ки озмуни ҷумҳуриявии «Беҳтарин хизматчии давлатӣ аз ҳисоби занон» баргузор карда мешавад.
Боиси ифтихор аст, ки соли 2025-ум дар ин озмун яке аз кормандони Вазорати адлияи Ҷумҳурии Тоҷикистон Раҳмонзода Закия иштирок карда, дар даври ҷумҳуриявӣ сазовори ҷойи якум гардид.
Ҳадафи асосии Барнома фароҳам овардани шароити мусоид ва имкониятҳои ҳамаҷониба ҷиҳати иштироки фаъолонаи занону духтарон дар ҳаёти сиёсӣ, иҷтимоӣ, иқтисодӣ ва фарҳангӣ ва дар ин замина баланд бардоштани мавқеъ, саводнокӣ ва маърифати ҳуқуқӣ, таъмини дастрасӣ ба хизмати давлатӣ, баланд бардоштани дараҷаи рақобатпазирӣ дар хизмати давлатӣ, тарбия, интихоб ва ҷобаҷогузории кадрҳои роҳбарикунандаи кишвар аз ҳисоби занону духтарони болаёқат мебошад.
Озмун дар се давр баргузор гардида, довталабон аз рўйи сифатҳои касбӣ донишҳои сиёсӣ ва касбӣ, иҷрои уҳдадориҳои мансабӣ (сифатнокии натиҷаи кори хизматчии давлатӣ, дараҷаи интизомнокӣ), донистани санадҳои меъёрии ҳуқуқӣ, таърих, фарҳанг, донистани забони давлатӣ ва забонҳои хориҷӣ, маҳорати кор бо технологияи иттилоотӣ (электронӣ), татбиқи донишу таҷриба дар мансаби ишғолнамуда, қобилияти таҳлилӣ ва маҳорати ифодаи фикр баҳогузрӣ карда мешаванд.
Маврид ба зикр аст, ки сазовори ҷойи якум гардидани яке аз кормандони Вазорати адлияи Ҷумҳурии Тоҷикистон боиси ифтихор буда, ҳамзамон гувоҳи фаъол будани занону духтарон дар фаъолияти пурсамари Вазорати адлияи Ҷумҳурии Тоҷикистон ба ҳисоб меравад.
