6-уми июли соли 2026 дар Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон ҷаласаи навбатии ҳайати мушовара оид ба ҷамъбасти натиҷаҳои фаъолияти Хадамот дар нимсолаи якуми соли 2026 ва муайян намудани вазифаҳо барои нимсолаи дуюми соли 2026 баргузор гардид.
Ҷаласаро сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон Вализода Исмоил ифтитоҳ намуда, оид ба масъалаҳои рӯзномаи ҷаласа ва вазифаҳои асосии Хадамот ибрози назар кард.
Дар кори ҷаласа сармутахассиси Раёсати рушди инфрасохтори Дастгоҳи иҷроияи Президенти Ҷумҳурии Тоҷикистон Аминзода Қудратулло иштирок намуд.
Тибқи рӯзномаи ҷаласа, нахуст ҳисоботи муовини якуми сардори Хадамот Ардашер Мирзозода оид ба натиҷаҳои фаъолияти Хадамот дар нимсолаи якуми соли 2026 шунида шуд.
Сипас, фаъолияти сохторҳои марказӣ ва минтақавии Хадамот мавриди таҳлил ва баррасӣ қарор гирифта, роҳбарони нозироти давлатӣ ва нозироти комплексии назорати бехатарии саноатӣ оид ба натиҷаҳои фаъолияти худ ҳисобот пешниҳод намуданд.
Дар ҷараёни муҳокима ба масъалаҳои баланд бардоштани самаранокии назорати давлатӣ, пешгирии ҳодисаҳои нохуш дар иншооти истеҳсолии хатарнок, иҷрои нақшаҳои тасдиқшуда, таҳкими интизоми хизматӣ ва беҳтар намудани сифати фаъолияти сохторҳои Хадамот таваҷҷуҳи махсус зоҳир гардид.
Ҳамзамон, ҷиҳати иҷрои Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030 ва Нақшаи чорабиниҳои амалисозии он барои марҳилаи дуюм (солҳои 2026–2030), инчунин иҷрои талаботи Консепсияи сиёсати давлатии Ҷумҳурии Тоҷикистон дар соҳаи дин, қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», «Дар бораи масъулият барои таълиму тарбияи кӯдак» ва «Дар бораи забони давлатии Ҷумҳурии Тоҷикистон» ба роҳбарони воҳидҳои сохторӣ ва кормандони Хадамот дастуру супоришҳои мушаххас дода шуданд.
Дар фарҷом аз рӯи масъалаҳои баррасишуда қарори дахлдори ҳайати мушовара қабул гардида, барои иҷрои вазифаҳои дар назди Хадамот қарордошта дар нимсолаи дуюми соли 2026 вазифаҳои мушаххас муайян карда шуданд.
Маркази матбуот
