8 апрели соли 2026 дар бинои Агентии инноватсия ва технологияҳои рақамӣ вохӯрии расмӣ ва ҷаласаи нахустини гурӯҳи корӣ байни Агентии инноватсия ва технологияҳои рақамии назди Президенти Ҷумҳурии Тоҷикистон ва Вазорати рушди рақамӣ, алоқа ва коммуникатсияҳои оммавии Федератсияи Россия баргузор гардид.
Дар чорабинӣ директори Агентии инноватсия ва технологияҳои рақамӣ Хуршед Мирзо ва муовини Вазири рушди рақамӣ, алоқа ва коммуникатсияҳои оммавии Федератсияи Россия Кучушев Сергей Александрович иштирок ва суханронӣ намуданд.
Қайд гардид, ки ҷаласаи нахустини гурӯҳи корӣ ҷиҳати татбиқи Ёддошти тафоҳум оид ба ҳамдигарфаҳмӣ байни Вазорати рушди рақамӣ, алоқа ва коммуникатсияҳои оммавии Федератсияи Россия ва Агентии инноватсия ва технологияҳои рақамии назди Президенти Ҷумҳурии Тоҷикистон вобаста ба ҳамкорӣ дар соҳаи рақамикунонӣ ва технологияҳои иттилоотӣ баргузор гардид.
Дар ҷараёни вохӯрӣ ҷонибҳо масъалаҳои муҳими ҳамкориро мавриди баррасӣ қарор дода, ба аҳамияти рушди ҳукумати электронӣ ва такмили хизматрасониҳои давлатӣ таъкид намуданд. Ҳамзамон, омодагии тарафҳо барои татбиқи лоиҳаҳои муштараки пилотӣ, рушди инфрасохтори рақамӣ, таъмини амнияти киберӣ, омодасозии кадрҳои баландихтисос, рушди соҳибкории рақамӣ, ҳамкорӣ дар самти зеҳни сунъӣ, ташкили барномаҳои муштараки таълимӣ ва табодули таҷриба изҳор карда шуд.
Дар ҳошияи вохӯрӣ ҳайати гурӯҳи кории ҷониби Федератсияи Россия аз Маркази хизматрасониҳои давлатӣ боздид намуда, бо ҷараёни пешниҳоди хизматрасониҳои давлатӣ дар шакли рақамӣ ва фаъолияти инфрасохтори муосири хизматрасонӣ аз наздик шинос гардид.
Дар фарҷоми вохӯрӣ ҷонибҳо омодагии худро барои густариши минбаъдаи ҳамкориҳои мутақобилан судманд изҳор намуда, баргузории ҷаласаҳои гурӯҳи кориро омили муҳими таъмини иҷрои самараноки тавофуқоти бадастомада арзёбӣ карданд.
