Тавре қаблан иттиллоъ дода шуд бо ташаббуси Саридораи ҳифзи сирри давлатӣ аз санаи 12 то 14 ноябри соли равон курси такмили ихтисос барои 30 нафар кормандони дахлдори мақомоти давлатӣ дар шаҳри Душанбе доир гардид.
Чорабинии мазкур аз ҷониби Саридораи ҳифзи сирри давлатӣ дар доираи Барномаи давлатии таҳкими ҳифзи сирри давлатӣ ва ҳифзи техникии иттилоот дар Ҷумҳурии Тоҷикистон роҳандозӣ гардида, ба шунавандагони курс тибқи барномаи таълимӣ дар ҳаҷми 16 соат вобаста ба мавзуъҳои мубрами соҳа мутахассисони соҳибтахассус дарс гуфтанд.
Мақсад аз баргузории чорабинии мазкур ин баррасии масъалаҳои марбут ба фаъолияти кормандони дахлдори мақомоти давлатӣ дар самти ҳифзи иттилооти дастрасиаш маҳдуд, омӯзиши талаботи санадҳои меъёрии ҳуқуқӣ, бартараф намудани камбудиҳои ҷойдошта ва дар ин замина баланд бардоштани савияи донишҳои соҳавии онҳо мебошад.
Курси такмили ихтисос дар шакли лексия - мубоҳиса ва кори амалӣ сурат гирифта, пас аз анҷом бо роҳи пешниҳоди саволномаи тестии соҳавӣ натиҷагирӣ карда шуд.
Дар охири чорабинӣ ба шунавандагони курси такмили ихтисос Гувоҳномаи хатм супорида шуд.
