Сухани табрикии раиси шаҳри Левакант Муминзода Мастура Табарӣ бахшида ба Рӯзи Ғалаба дар Ҷанги Бузурги Ватанӣ Ҳамдиёрони азиз! Собиқадорони ҷангу меҳнат, фарзандони сарбаланди Ватан! Бо камоли эҳтиром ва ифтихор ҳамаи Шумо — сокинони шарафманди…
Сухани табрикии раиси шаҳри Левакант Муминзода Мастура Табарӣ бахшида ба Рӯзи Ғалаба дар Ҷанги Бузурги Ватанӣ
Ҳамдиёрони азиз!
Собиқадорони ҷангу меҳнат,
фарзандони сарбаланди Ватан!
Бо камоли эҳтиром ва ифтихор ҳамаи Шумо — сокинони шарафманди кишвари азизамон Тоҷикистонро ба муносибати Рӯзи Ғалаба дар Ҷанги Бузурги Ватанӣ самимона табрик менамоям.
Рӯзи Ғалаба барои ҳар як фарди ватандӯст санаи муқаддас ва фаромӯшнопазир мебошад. Ин рӯз рамзи ҷасорат, матонат, шуҷоат ва иродаи қавии халқҳоест, ки барои ҳифзи озодӣ, сулҳ ва зиндагии осоишта ҷони худро нисор карданд. Маҳз бо қаҳрамониву мардонагии фарзандони далеру шуҷои Ватан бар душмани золим пирӯзӣ ба даст омад ва инсоният аз хатари бузурги фашизм раҳо ёфт.
Мо имрӯз бо эҳсоси баланди ифтихор аз корномаҳои фарзандони бонангу ори миллат ёдовар мешавем, ки дар солҳои вазнини ҷанг дар майдонҳои набард қаҳрамонӣ нишон дода, барои зиндагии осудаи наслҳои оянда ҷоннисорӣ карданд. Ҳар як саҳифаи таърихи он солҳои мудҳиш пур аз мисолҳои ватандӯстӣ, мардонагӣ ва садоқат ба Ватан мебошад.
Мардуми Тоҷикистон низ дар қатори дигар давлатҳои иттиҳоди шӯравӣ дар таъмини Ғалаба саҳми арзандаи худро гузоштаанд. Садҳо нафар ҷавонони шуҷои диёр ба ҷабҳа рафта, дар муҳорибаҳои сахт иштирок намуданд. Қисме аз онҳо ба Ватан барнагаштанд ва номи худро дар саҳифаҳои таърих абадан сабт карданд. Онҳое, ки аз ҷанг баргаштанд, барои барқарорсозии хоҷагии халқ, рушди иқтисод ва ободии кишвар саҳми босазо гузоштанд.
Имрӯз вазифаи муқаддаси мо — эҳтиром гузоштан ба хотираи шаҳидон, қадршиносӣ аз хизматҳои собиқадорон ва тарбияи насли ҷавон дар рӯҳияи ватандӯстӣ, худшиносӣ ва ҳифзи арзишҳои миллӣ мебошад. Зеро сулҳу субот ва оромие, ки имрӯз мо дар Тоҷикистони соҳибистиқлол дорем, ба осонӣ ба даст наомадааст. Барои ҳифзи он ҳазорон нафар қурбонӣ шудаанд.
Мо бояд ҳамеша аз таърих сабақ гирем ва нагузорем, ки фоҷиаҳои ҷанг такрор шаванд. Ҷанг ба инсон танҳо ғаму андӯҳ, талафоти ҷонӣ ва вайронии зиндагиро меорад. Аз ин рӯ, пос доштани сулҳ ва ваҳдати миллӣ вазифаи муқаддаси ҳар як шаҳрванд мебошад.
Боиси ифтихор аст, ки имрӯз таҳти роҳбарии хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон кишвари азизи мо дар фазои сулҳу субот рушд намуда, барои зиндагии шоистаи мардум тамоми шароит муҳайё мегардад.
Арҷгузорӣ ба таърих, эҳтироми қаҳрамонон ва дастгирии собиқадорон ҳамеша дар меҳвари сиёсати давлат қарор дорад.
Мо ҷавононро бояд ба он ҳидоят намоем, ки бо омӯзиши таърихи миллат ва корномаҳои қаҳрамонон ҳисси ватандӯстии худро тақвият бахшанд. Зеро ҷавонон неруи пешбарандаи ҷомеа ва ояндаи давлат мебошанд. Танҳо насли худогоҳу соҳибмаърифат метавонад дастовардҳои истиқлолият ва сулҳи пойдорро ҳифз намояд.
Дар ин рӯзи пурифтихор ба ҳамаи собиқадорони ҷанг ва меҳнат, ки имрӯз миёни мо ҳастанд, изҳори сипосу миннатдорӣ менамоем. Шумо намунаи олии шуҷоат, сабру таҳаммул ва муҳаббат ба Ватан ҳастед. Корнамоиҳои Шумо ҳаргиз аз ёдҳо нахоҳанд рафт.
Ҳамзамон, ба рӯҳи поки ҳамаи онҳое, ки барои озодӣ ва ҳифзи Ватан ҷони худро қурбон карданд, арҷ мегузорем. Хотираи неки онҳо ҳамеша дар қалби мардум зинда хоҳад монд.
Бигзор дар Тоҷикистони азизамон ҳамеша сулҳу оромӣ, дӯстиву ҳамдигарфаҳмӣ ва ваҳдати миллӣ ҳукмфармо бошад. Бигзор осмони кишвари мо ҳамеша софу беғубор ва хонадони ҳар як тоҷику тоҷикистонӣ пур аз меҳру муҳаббат ва файзу баракат гардад.
