НАЗОРАТИ РАФТИ КОРҲОИ ТАЪМИРУ ОБОДОНӢ ДАР МУАССИСАИ САНИТАРӢ - БОЗДИДИ РАИСИ ШАҲРИ ЛЕВАКАНТ

2-юми май — раиси шаҳри Левакант Муминзода Мастура Табарӣ ҳамроҳ бо дигар масъулини аз рафти корҳои таъмир ва ободонӣ дар Муассисаи давлатии назорати санитарию эпидемологии шаҳри Левакант боздид ба амал оварданд.

Зимни боздид ба раиси шаҳр маълумот дода шуд, ки корҳои таъмирӣ дар муассиса бо мақсади беҳтар намудани шароити хизматрасонӣ ва мутобиқ гардонидани муҳити корӣ ба талаботи муосир амалӣ гардида истодаанд. Аз ҷумла, навсозии утоқҳои корӣ, таъмири шабакаҳо ва ободонии гирду атрофи муассиса дар доираи нақша бахшида ба 35-солагии Истиқлолияти давлатӣ идома доранд.

Муминзода Мастура Табарӣ рафти корҳои анҷомдодашударо мавриди арзёбӣ қарор дода, ба масъулин ҷиҳати таъмини сифати баланд ва анҷоми саривақтии корҳои таъмирӣ дастуру супоришҳои мушаххас дод. Таъкид гардид, ки муассисаҳои соҳаи тандурустӣ, бахусус сохторҳои назорати санитарию эпидемологӣ, дар ҳифзи саломатии аҳолӣ нақши муҳим доранд ва фароҳам овардани шароити мусоиди корӣ барои кормандони онҳо зарур мебошад.

Ҳамзамон, ба масъулин супориш дода шуд, ки дар баробари корҳои таъмирӣ ба масъалаи тозагиву ободонии муҳити атроф низ таваҷҷуҳи ҷиддӣ зоҳир намоянд, зеро муҳити тоза омили асосии пешгирии бемориҳои сироятӣ ба ҳисоб меравад.