АРТИШИ МИЛЛӢ – ТАКЯГОҲИ МИЛЛАТ Сухани табрикии раиси шаҳри Левакант – Муми

Сухани табрикии раиси шаҳри Левакант – Муминзода Мастура Табарӣ бахшида ба 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон

 

Муҳтарам афсарону сарбозон!

 

Собиқадорони Қувваҳои Мусаллаҳ!

 

Бо ифтихору сарфарозӣ ҳамаи Шумо ва дар симои Шумо тамоми ҳайати шахсии Қувваҳои Мусаллаҳи Ҷумҳурии Тоҷикистонро ба муносибати 33-юмин солгарди таъсисёбии Артиши миллӣ самимона табрик менамоям.

 

Рӯзи таъсисёбии Қувваҳои Мусаллаҳ барои ҳар як шаҳрванди ватандӯст санаи таърихӣ ва пурифтихор ба ҳисоб меравад. Зеро Артиши миллӣ ҳамчун сипари боэътимоди давлату миллат, рамзи истиқлолу соҳибихтиёрӣ ва кафили амнияти кишвар ба шумор меравад. Маҳз бо талошу заҳматҳои фарзандони содиқи Ватан ва бо сиёсати хирадмандонаи роҳбарияти олии кишвар заминаҳои ташаккул ва таҳкими Қувваҳои Мусаллаҳи Ҷумҳурии Тоҷикистон гузошта шуда, имрӯз он ба як ниҳоди муназзаму қавӣ табдил ёфтааст.

 

Таърихи таъсисёбии Артиши миллӣ ба давраи ҳассосу сарнавиштсози давлатдории навини тоҷикон рост меояд. Дар он рӯзҳои пурошӯб ва сангин зарурати таъсиси неруи мустақили ҳарбӣ ҳамчун рукни асосии давлатдорӣ пеш омад. Бо вуҷуди мушкилоти зиёди иқтисодиву иҷтимоӣ, давлат тавонист пояҳои Артиши миллиро бунёд намояд ва тадриҷан онро ба сохтори мукаммалу пуриқтидор табдил диҳад. Имрӯз Қувваҳои Мусаллаҳи Ҷумҳурии Тоҷикистон дорои сохтори замонавӣ, низоми идоракунии такмилёфта ва ҳайати касбии омодабуда мебошанд.

 

Артиши миллӣ барои ҳифзи истиқлол, тамомияти арзӣ, суботу оромӣ ва ҳимояи ҳуқуқу манфиатҳои қонунии шаҳрвандон нақши калидӣ мебозад. Дар шароити ҷаҳони муосир, ки вазъи сиёсиву низомӣ дар баъзе минтақаҳо ноором боқӣ мемонад, аҳамияти омодагии ҷангии неруҳои мусаллаҳ ва тақвияти қобилияти мудофиавии давлат бештар мегардад. Аз ин рӯ, баланд бардоштани сатҳи касбияти афсарону сарбозон, таъмини шароити хуби хизмат, таҳкими интизоми ҳарбӣ ва тарбияи ҳисси баланди ватандӯстӣ аз вазифаҳои муҳим ба шумор мераванд.

 

Мо бо ифтихор изҳор медорем, ки хизматчиёни ҳарбии кишвар бо садоқат ба Савганди ҳарбӣ, бо руҳияи баланди миллӣ ва масъулияти бузург вазифаҳои худро иҷро менамоянд. Онҳо дар ҳифзи сарҳади давлатӣ, таъмини амнияти дохилӣ, иштирок дар машқҳои ҳарбӣ ва чорабиниҳои муҳими давлатӣ саҳми назаррас мегузоранд. Ҷасорату мардонагӣ, матонату устуворӣ ва интизоми намунавии онҳо мояи ифтихори миллат мебошад.

 

Дар баробари ин, даъвати ҷавонон ба сафи Қувваҳои Мусаллаҳ яке аз самтҳои муҳими сиёсати давлатӣ дар соҳаи мудофиа ба ҳисоб меравад. Хизмат дар Артиши миллӣ барои ҳар ҷавони ватандӯст мактаби шуҷоату мардонагӣ, интизому масъулиятшиносӣ ва садоқат ба Ватан аст. Маҳз дар сафи Артиш ҷавонон рӯҳи ватандӯстӣ, эҳтиром ба арзишҳои миллӣ ва ҳисси ифтихор аз давлату миллатро дар худ тақвият мебахшанд.

Мақомоти иҷроияи ҳокимияти давлатии шаҳри Левакант дар самти иҷрои уҳдадориҳо оид ба даъвати ҷавонон ба сафи Қувваҳои Мусаллаҳ, беҳтар намудани корҳои фаҳмондадиҳӣ, ҳамкорӣ бо комиссариатҳои ҳарбӣ ва дастгирии оилаҳои хизматчиёни ҳарбӣ тадбирҳои заруриро амалӣ менамояд. Мо итминон дорем, ки ҷавонони шаҳри мо ҳамеша бо эҳсоси баланди масъулият барои адои қарзи фарзандии худ омодаанд.

 

Ҳамзамон, бояд таъкид намуд, ки таҳкими иқтидори мудофиавии кишвар танҳо вазифаи сохторҳои ҳарбӣ нест, балки рисолати ҳар як шаҳрванди ватандӯст мебошад. Ваҳдат, ҳамдигарфаҳмӣ, эҳтиром ба қонун ва дастгирии сиёсати давлатӣ омили муҳими устувории ҷомеа ва амнияти миллӣ мебошанд. Дар ин раванд саҳми ҷомеаи шаҳрвандӣ, падару модарон, муассисаҳои таълимӣ ва ташкилоту идораҳо низ назаррас аст.

 

Мо бояд ҷавононро дар рӯҳияи худшиносӣ, ифтихор аз таърихи пурғановати халқамон ва арҷгузорӣ ба арзишҳои миллӣ тарбия намоем. Зеро танҳо насли дорои ҷаҳонбинии солим ва ҳисси баланди ватандӯстӣ метавонад дар оянда давлатро ҳифз ва пешрафти онро таъмин намояд.

Дар ин рӯзи фархунда, бо эҳтироми хоса ба хотири он сарбозону афсароне, ки дар роҳи ҳифзи Ватан ҷоннисорӣ намудаанд, сари таъзим фуруд меорем. Номи неки онҳо ҳамеша дар саҳифаҳои таърих бо ҳарфҳои заррин сабт гардида, намунаи ибрат барои наслҳои оянда боқӣ хоҳад монд.

 

Муҳтарам хизматчиёни ҳарбӣ!

 

Бори дигар Шуморо ба ифтихори 33-юмин солгарди таъсисёбии Қувваҳои Мусаллаҳи Ҷумҳурии Тоҷикистон самимона табрик гуфта, бароятон сиҳатмандӣ, иродаи қавӣ, рӯҳияи шикастнопазир, сарбаландӣ ва муваффақиятҳои нав ба нав орзу менамоям.

 

Бигзор Артиши миллии мо ҳамеша неруманду муқтадир бошад, фазои сулҳу субот дар Тоҷикистони азизамон пойдор бимонад ва Парчами давлатии Ҷумҳурии Тоҷикистон дар фазои орому осуда парафшон бошад.

 

Артиши миллӣ – такягоҳи миллат ва сипари боэътимоди Ватан аст!

 

Ид муборак, ҳомиёни шуҷои Ватан!