Семинари мазкур дар асоси Нақшаи конференсияҳо ва семинарҳои илмӣ-амалии минтақавӣ, рӯзҳои саҳроӣ, фермерӣ ва мизи мудаввар, ки аз ҷониби Раёсати АИКТ 30 декабри соли 2024, №2 тасдиқ шудааст, дар мавзӯи «Аҳамияти амалисозии усулҳои инноватсионии…
Семинари мазкур дар асоси Нақшаи конференсияҳо ва семинарҳои илмӣ-амалии минтақавӣ, рӯзҳои саҳроӣ, фермерӣ ва мизи мудаввар, ки аз ҷониби Раёсати АИКТ 30 декабри соли 2024, №2 тасдиқ шудааст, дар мавзӯи «Аҳамияти амалисозии усулҳои инноватсионии пешгирии бемориҳои сироятии ҳайвонот ва зоонозҳо дар таъмини амнияти озуқавории мамлакат» дар Маркази таъминоти бехатарии озуқавории Кумитаи бехатарии озуқавории назди Ҳукумати Ҷумҳурии Тоҷикистон дар ноҳияи Рашт баргузор гардид.
Дар кори семинар олимони Институти тибби ветеринарӣ, мутахассисони марказҳои таъминоти бехатарии озуқавории ноҳияи Рашт, инчунин мутахассисони марказҳои ташхиси бехатарии озуқавории ноҳияҳои Тоҷикобод, Сангвор, Нуробод ва дигар минтақаҳо иштирок намуданд.
Семинар дар доираи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба ҳамгироии илм бо истеҳсолот ва тайёр кардани мутахассисони соҳаи чорводорӣ ҷиҳати пешгирӣ ва мубориза бо бемориҳои сироятӣ ва зоонозҳо баргузор гардид. Ин иқдом ба амалигардонии яке аз ҳадафҳои стратегии кишвар – ҳифзи амнияти озуқаворӣ – мусоидат менамояд.
Дар шароити имрӯза, ки фермаҳои чорво, асосан дар хоҷагиҳои деҳқониву фермерӣ фаъолият мекунанд, мубориза алайҳи бемориҳои сироятӣ ва зоонозҳо ҷиҳати таъмини бехатарии маҳсулоти озуқаворӣ аҳамияти хоса дорад.
Иштирокчиёни семинар маърузаҳои илмиро муҳокима намуда, таъкид карданд, ки такмил додани усулҳои ташхис, пешгирӣ ва мубориза бар зидди бемориҳои сироятӣ ва зоонозҳо бо истифода аз технология ва усулҳои инноватсионӣ яке аз масъалаҳои муҳим дар рушди устувори иқтисодиёти соҳа буда, заминаи боэътимод барои таъмини амнияти озуқаворӣ мегузорад.
Ҳамчунин, дар ҳаллу фасли масъалаҳои ҳалталаби соҳа саҳми олимон ва мутахассисони соҳавӣ, истифодаи пойгоҳҳои муосири таҳқиқотӣ ва истеҳсоли маводи табобатию пешгирикунандаи ватанӣ муҳим арзёбӣ гардид.
