Бо ибтикори Саридораи ҳифзи сирри давлатии назди Ҳукумати Ҷумҳурии Тоҷикистон дар доираи нақшаи чорабиниҳои амалисозии Барномаи давлатии таҳкими ҳифзи сирри давлатӣ ва ҳифзи техникии иттилоот дар Ҷумҳурии Тоҷикистон барои солҳои 2022 – 2026, ки бо қарори Ҳукумати Ҷумҳурии Тоҷикистон аз 29 июли соли 2022, №377 тасдиқ гардидааст, санаи 28 августи соли равон бо иштироки масъулони масъулони мақоми низоми махфияти мақомоти давлатӣ ва ташкилотҳои шаҳри Душанбе чорабиниҳои машваратӣ - омӯзишӣ дар мавзӯи “Ҳифзи сирри давлатӣ ва ҳифзи техникии иттилоот, камбудиҳои ҷойдошта, роҳҳои бартарафнамоии онҳо” ва даври якуми озмуни ҷумҳуриявии “Беҳтарин масъули мақоми низоми махфият” дар соли 2025 баргузор гардид.
Дар оғози чорабинӣ роҳбарияти Саридораи ҳифзи сирри давлатии назди Ҳукумати Ҷумҳурии Тоҷикистон иштирок ва суханронӣ намуда, зикр карданд, ки бо таваҷҷӯҳи хоса ба ин самти муҳими давлатдорӣ ва дастгирии давлату Ҳукумати кишвар, бахусус Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи ҳифзи сирри давлатӣ ва ҳифзи техникии иттилоот дар кишвар рушд ёфта, дастгирӣ ёфтани ташаббусҳои Саридора, бахусус қабул гардидани “Барномаи давлатии таҳкими ҳифзи сирри давлатӣ ва ҳифзи техникии иттилоот дар Ҷумҳурии Тоҷикистон барои солҳои 2022 – 2026”, қабули қарори Ҳукумати Ҷумҳурии Тоҷикистон “Дар бораи тартиби додани ҷубронпулӣ ба шаҳрвандоне, ки корашон ба сирри давлатӣ алоқаманд аст” ва дар ин асно ба андозаи 15 фоиз баланд бардоштани маоши кормандони дахлдор ҷиҳати таъмини шароити мусоид баҳри дуруст ба роҳ мондани фаъолият, таъмини амнияти иттилоотӣ ва ҳифзи техникии иттилоот заминаи мусоид фароҳам оварда истодааст.
Чорабиниҳои мазкур бо мақсади баланд бардоштани сифатнокии фаъолияти хизматӣ, рушд додани донишҳои соҳавӣ, дарёфт ва ҳавасманд намудани масъулони дахлдоре, ки нишондиҳандаҳои хуби корӣ дошта, фаъолияти дурусту босамарро дар мақомоти давлатӣ ва ташкилотҳои Ҷумҳурии Тоҷикистон ба роҳ мондаанд, доир карда шуд.
Лозим ба зикр аст, ки ғолибони зердаври якум бо Сипосномаи Саридора ва иштирокчиёну ғолибони даври ҷумҳуриявии озмун бо Ҷом, Ифтихорнома ва тӯҳфаҳо қадрдонӣ карда мешаванд.
