Бо мақсади таъмини иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, инчунин ҷиҳати амалишавии “Стратегияи миллӣ оид ба назорати маводи нашъаовар дар Ҷумҳурии Тоҷикистон барои солҳои 2021-2030” ва Нақшаи чорабиниҳои амалисозии он барои солҳои 2021-2025, вобаста ба баланд бардоштани маълумотнокии аҳолӣ оид ба зарари маводи нашъаовар дар ҷомеа, роҳандозӣ намудани тарғиби тарзи ҳаёти солим, ҷалб намудани наврасону ҷавонон ба варзиш ва пешгирию коҳиш додани сатҳи нашъамандӣ, Агентии назорати маводи нашъаовари назди Президенти Ҷумҳурии Тоҷикистон мунтазам дар байни ҳамаи табақаҳои аҳолӣ чорабиниҳои гуногуни оммавӣ баргузор менамояд.
Ба ин ҳадаф, бахшида ба Рӯзи ҷаҳонии мубориза бо Вируси норасоии масунияти одам (ВНМО) / Бемории пайдошудаи норасоии масуният (БПНМ) дар Муассисаи таҳсилоти миёнаи умумии №11-и ноҳияи Исмоили Сомонии шаҳри Душанбе, дар доираи чорабинии муштараки Агентии назорати маводи нашъаовари назди Президенти Ҷумҳурии Тоҷикистон дар ҳамбастагӣ бо Мақомоти иҷроияи ҳокимияти давлатии ноҳияи Исмоили Сомонии шаҳри Душанбе, мусобиқаи варзишӣ аз намуди “Тенниси рӯи миз” таҳти шиори «Ҷавонон бар зидди маводи нашъаовар», доир карда шуд.
Зикр кардан ба маврид аст, ки ҳифзи саломатии аҳолӣ, амнияти давлатӣ ва ҷамъиятӣ, амалӣ намудани сиёсати давлатӣ ва шартномаҳои байналмилалии Ҷумҳурии Тоҷикистон дар соҳаи муомилоти қонунии воситаҳои нашъадор, моддаҳои психотропӣ ва прекурсорҳо, мубориза бар зидди муомилоти ғайриқонунии онҳо, пешгирии нашъамандӣ ва мубориза бо Вируси норасоии масунияти одам (ВНМО) / Бемории пайдошудаи норасоии масуният (БПНМ) вазифаи муқаддаси ҳар як корманди мақомоти ҳифзи ҳуқуқ ва ҳар як шаҳрванди Ҷумҳурии Тоҷикистон мебошад.
Ҷамъбасти мусобиқаи варзишӣ аз намуди “Тенниси рӯи миз” дар остонаи таҷлили Рӯзи байналмилалии волонтёрон (5 декабр) ва Рӯзи байналмилалии ҳуқуқи инсон (10 декабр), ки ҳамасола ҷомеаи ҷаҳонӣ ҷашн мегиранд, рост омадааст.
Дар оғоз намояндагони Мақомоти иҷроияи ҳокимияти давлатии ноҳияи Исмоили Сомонии шаҳри Душанбе ва Агентии назорати маводи нашъаовари назди Президенти Ҷумҳурии Тоҷикистон бо суханони ифтитоҳӣ ва табрикотӣ ба чорабинии мазкур ҳусни оғоз бахшида, ба иштирокчиён ва меҳмонон ҷиҳати иштирокашон дар чорабинии пешгирикунанда баромад намуданд.
Қайд гардид, ки 1-уми декабр Рӯзи ҷаҳонии мубориза бо Вируси норасоии масунияти одам (ВНМО) / Бемории пайдошудаи норасоии масуният (БПНМ), 5-уми декабр Рӯзи байналмилалии волонтёрон ва 10-уми декабр Рӯзи байналмилалии ҳуқуқи инсон бо ташкили силсила чорабиниҳои фарҳангиву сиёсӣ, озмунҳо ва мусобиқаҳои мухталифи варзиши таҷлил мегарданд.
Даври ниҳоии мусобиқаи варзишӣ оид ба тенниси рӯи миз байни омӯзгорон ва наврасону ҷавонони муассисаҳои таҳсилоти миёнаи умумии ноҳияи Исмоили Сомонӣ ҷамъбаст гардида, ғолибони он муайян карда шуданд.
Дар интиҳо, аз номи Агентии назорати маводи нашъаовари назди Президенти Ҷумҳурии Тоҷикистон ва Мақомоти иҷроияи ҳокимияти давлатии ноҳияи Исмоили Сомонии шаҳри Душанбе ғолибон, устодон ва омӯзгорон бо Диплом, Сипосномаҳо ва тӯҳфаҳои хотиравӣ қадрдонӣ карда шуданд.
