Дар доираи сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба шаҳру ноҳияҳои Кӯлоб, Фархор ва Восеъ дар ноҳияи Фархор бинои маъмурии шуъбаи байниноҳиявии Агентии назорати маводи нашъаовари назди Президенти Ҷумҳурии Тоҷикистон мавриди истифода қарор дода шуд.
Ин бино бо мақсади фароҳам овардани шароити мусоиди хизматӣ барои кормандони сохтори мазкур ва таҳкими заминаи моддию техникии фаъолияти мақомоти ҳифзи ҳуқуқ бунёд гардидааст.
Иншооти мазкур дорои инфрасохтори зарурӣ буда, барои фаъолияти самараноки кормандон ва иҷрои вазифаҳои хизматӣ шароити мувофиқ фароҳам оварда шудааст.
Дар бино 5 ҳуҷраи хоб барои 9 нафар, 8 ҳуҷраи корӣ, маҷлисгоҳи асосӣ ва маҷлисгоҳи хурд, толори варзишӣ, бойгонӣ, ду анбор ва ошхона ҷойгир шудаанд.
Ҳамзамон, дар қисми алоҳидаи бино қисми навбатдорӣ бо ҳуҷраи истироҳату хоби навбатдорон ташкил гардида, барои нигоҳдории силоҳу аслиҳа ва далелҳои шайъӣ ҷойҳои махсус пешбинӣ шудааст.
Яке аз бахшҳои муҳими иншоотро ҳуҷраҳои нигоҳдории муваққатии шахсони дастгиршуда ташкил медиҳанд. Барои ин мақсад ду ҳуҷраи махсус бо ғунҷоиши то 4 нафар ва майдони алоҳида барои сайру гашти онҳо пешбинӣ гардидааст. Инчунин, барои гузаронидани чорабиниҳои дахлдори хизматӣ ҳуҷраи пурсиш мавҷуд мебошад.
Бо мақсади таъмини шароити зарурӣ дар фасли сармо ва нигоҳдории ҳарорати мувофиқ дар дохили бино, дар ҳудуди ҳавлӣ деги буғии ангиштӣ (котелхона) насб гардидааст.
Дар саҳни иншоот инчунин ду ҳуҷраи ёрирасон ва анборхона бунёд гардида, барои нигоҳдории ашё ва таҷҳизоти зарурӣ истифода мешаванд.
Барои таъмини низоми дахлдори амниятӣ ва назорати вуруд ва баромади кормандон, дар иншоот нуқтаи назоратии гузаргоҳ ташкил гардидааст. Ҳамчунин, барои ҷойгир намудани воситаҳои нақлиёти хизматӣ ду нуқтаи таваққуфгоҳ дар саҳни бино пешбинӣ шудааст.
Таъмини сохторҳои Агентии назорати маводи нашъаовар бо чунин иншооти замонавӣ ба беҳтар гардидани шароити хизматӣ, таҳкими имкониятҳои моддию техникӣ ва фароҳам овардани муҳити муносиб барои фаъолияти кормандон мусоидат менамояд.
Бунёд ва мавриди истифода қарор гирифтани чунин иншооти хизматӣ дар доираи тадбирҳои созандагию ободонӣ, ки бо мақсади таҳкими заминаи моддию техникии сохторҳои давлатӣ ва беҳтар намудани шароити фаъолияти хизматчиён амалӣ мегарданд, қадами муҳим ба ҳисоб меравад.
