10 июли соли 2024 ҷаласаи Агентии авиатсияи граждании назди Ҳукумати Ҷумҳурии Тоҷикистон ва корхонаҳои авиатсионии кишвар бо мақсади натиҷагирӣ аз фаъолияти нимсолаи аввали соли 2024 дар толори бинои Агентӣ баргузор гардид.
Зимни баргузории ҷаласа аз ҷониби Директори Агентӣ муҳтарам Назарзода Ҳабибулло ва намояндаи Дастгоҳи иҷроияи Президенти Ҷумҳурии Тоҷикистон муҳтарам Амирзода Маҳмуд оиди боз ҳам беҳтар намудани сатҳу сифати хизматрасонӣ дар фурудгоҳҳои кишвар, сазовор пешвоз гирифтани 33 солагии истиқлолияти давлатии Ҷумҳурии Тоҷикистон, иҷрои қонунҳои миллӣ ва дастуру супоришҳои Роҳбари давлат ҷиҳати эълон гардидани соли 2024 «Соли маърифати ҳуқуқӣ», дар сатҳи зарурӣ ҷашн гирифтани 100 солагии Рӯзи таъсисёбии авиатсияи миллӣ, нашри китоби ҷашнӣ ва газетаи соҳавӣ, рушди соҳаи авиатсия, дар муддати муқарраршуда таҳия ва пешниҳоди санадҳои меъёрии ҳуқуқии соҳа, саҳм гузоштан дар ободии Ватан дастурҳо доданд.
Инчунин, қайд гардид, ки баимзорасии Ёддошти тафоҳуми иловагӣ байни Агентии авиатсияи гражданӣ ва Маъмурияти авиатсияи граждании Ҳукумати Ҷумҳурии Исломии Покистон оид ба хизматрасонии алоқаи ҳавоӣ, ки санаи 2 июли соли ҷорӣ бо иштироки Президенти Ҷумҳурии Тоҷикистон муҳтарам Эмомалӣ Раҳмон баргузор гардид, ҷиҳати боз ҳам рушд ва рақобатпазир намудани соҳаи авиатсияи граждании кишвар нақши муҳим мебозад.
