Бахшида ба ҷашни бузурги миллӣ — 35-солагии Истиқлолияти давлатии Ҷумҳурии Тоҷикистон дар Агентии назорати маводи нашъаовари назди Президенти Ҷумҳурии Тоҷикистон мусобиқаҳои варзишӣ аз 20-уми август оғоз гардида, то 1-уми сентябри соли ҷорӣ баргузор гардид.
Дар доираи мусобиқаҳо кормандони Агентӣ аз рӯи намудҳои турниккашӣ, тенниси рӯи миз, ва бардоштани вазн бо ҳам рақобат менамоянд.
Чорабинӣ бо сухани ифтитоҳии муовини Директори Агентӣ полковники хизмати назорати маводи нашъаовар Шаҳбоз Комилзода оғоз гардида, зимни суханронӣ таъкид намуданд, ки Истиқлолияти давлатӣ дастоварди бузурги таърихӣ ва омили асосии таҳкими сулҳу субот ва рушди устувори кишвар ба ҳисоб рафта, ҳифзу таҳкими ин дастовардҳо аз ҳар як шаҳрванди кишвар масъулияти баланди ватандӯстиро тақозо менамояд.
Дар мусобиқаҳои варзишӣ, ки дар фазои дӯстӣ, ҳамдигарфаҳмӣ ва рақобати солим баргузор мегарданд, кормандони дастгоҳи марказӣ, раёсату шуъбаҳои байниноҳиявӣ, инчунин ҳайати шахсии раёсатҳои Агентӣ дар вилоятҳои Суғду Хатлон ва Вилояти Мухтори Кӯҳистони Бадахшон фаъолона иштирок доранд.
Варзиш на танҳо омили муҳими таҳкими саломатӣ ва тарғиби тарзи ҳаёти солим, балки воситаи муассири ташаккули иродаи қавӣ, рӯҳияи матонат ва ҳисси баланди ватандӯстӣ мебошад.
Ҳайати шахсии Агентӣ бо иштироки фаъол дар мусобиқаҳои мазкур бори дигар собит менамоянд, ки ба арзишҳои муқаддаси миллӣ арҷ гузошта, бо эҳсоси баланди масъулият барои ҳифзи Ватан, соҳибихтиёрии кишвар ва рушди ҷомеа саҳми арзанда мегузоранд.
Мусобиқаҳои варзишӣ идома дошта, дар фарҷом ғолибон муайян ва бо туҳфаҳои хотиравӣ қадрдонӣ карда мешаванд.
