Асри XXI давраи рушди босуръати технологӣ, рақамикунонӣ ва истифодаи васеи зеҳни сунъӣ мебошад. Тоҷикистон низ ҳамчун аъзои фаъоли ҷомеаи ҷаҳонӣ дар роҳи гузариш ба иқтисоди рақамӣ ва ҷомеаи иттилоотӣ қадамҳои устувор мегузорад.
Бо мақсади амалӣ гардидани низоми иттилоотии идоракунии кишоварзӣ санаи 22 апрел, дар шаҳри Душанбе бо иштироки муовини аввали Вазири кишоварзӣ ва намояндаи муассисаи давлатии Рушди соҳибкорӣ дар соҳаи кишоварзӣ” мулоқоти корӣ бо масъулони соҳаи кишоварзӣ оид ба рақамикунонии соҳа баргузор гардид.
Чорабинии мазкур дар доираи татбиқи сиёсати давлатии рушди соҳаи кишоварзӣ ва баланд бардоштани самаранокии фаъолияти он доир гардида, дар он масъалаҳои муҳими марбут ба рақамикунонии соҳа, истифодаи технологияҳои муосир ва таъмини устувории истеҳсолот мавриди баррасӣ қарор гирифтанд.
Бо дастгирии Ҳукумати Ҷумҳурии Тоҷикистон ва дар доираи лоиҳаи “Баланд бардоштани устувории кишоварзӣ” аз ҷониби Муассисаи давлатии «Рушди соҳибкорӣ дар соҳаи кишоварзӣ» ба шуъбаҳои кишоварзии шаҳру ноҳияҳои тобеи ҷумҳурӣ (ШНТҶ) 185 адад таҷҳизоти муосири идоравӣ, аз ҷумла ноутбук, компютер, принтер ва дигар лавозимоти зарурӣ тақдим карда шуд. Ин иқдом ба рушди низоми электронии идоракунии соҳа ва беҳтар гардидани сифати хизматрасонӣ мусоидат хоҳад кард.
