Ҳамватанони азиз!
Бо камоли фараҳу ифтихор Шумоёнро ба муносибати Рӯзи Парчами давлатии Ҷумҳурии Тоҷикистон рамзи соҳибдавлатӣ, ваҳдати миллӣ, шарафу ифтихори ҳар як фарди миллат, самимона табрик менамоям. Ба тамоми сокинони кишвар саломатии бардавом, файзу баракати рӯзгор ва ба Тоҷикистони маҳбубамон сулҳу суботи ҷовидон орзу дорам. Парчами давлатӣ ҳамчун яке аз муқаддасоти миллӣ дар таърихи давлатдории навини тоҷикон ҷойгоҳи арзанда дорад. Ин рамзи муқаддас барои миллати мо заминаи худшиносӣ ва ифодагари орзую умедҳои созандаи халқамон мебошад. Ҳамзамон Парчам бозгӯйи ҷасорат, матонат ва иродаи устувори тоҷикон барои созандагӣ ва рушди босуботи давлат аст. Дар даврони соҳибистиқлолӣ, бо ҳидояту раҳнамоии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, парчами мо дар арсаи ҷаҳонӣ бо ифтихор барафрохта гардида, Тоҷикистон ҳамчун кишвари сулҳпарвар, боварибахш ва рӯ ба тараққӣ дар ҷаҳон шинохта шудааст. Боло бурдани ин рамзи муқаддас дар ҳар гӯшаи олам гувоҳи дастовардҳо, пешрафт ва нуфузи афзояндаи кишвари азизамон мебошад. Парчами давлатӣ барои миллати мо танҳо як рамзи давлатӣ нест, балки он таҷассумгари ғурур, ҳувияти миллӣ, шукргузорӣ аз давлати соҳибистиқлол ва ормонҳои неку созандаи мардуми тоҷик аст. Ин муқаддасоти миллӣ моро ба масъалаҳои тақдири давлат, ҳифзи сулҳу субот ва эҳтироми арзишҳои миллӣ раҳнамоӣ мекунад. Имрӯз ҳар як шаҳрванди Тоҷикистон бояд ба Парчами давлатӣ ҳамчун рамзи ягонагӣ, худшиносӣ ва ватандории баланд арҷ гузорад ва дар таҳкими нуфузу шарафи он саҳми созандаи худро дошта бошад. Итминон дорам, ки дар фазои меҳанпарастӣ ва муттаҳидӣ мо минбаъд низ ба комёбиҳои нав ноил мегардем. Бо истифода аз фурсат, бори дигар ҳамаи ҳамватанонро бо ин ҷашни муборак табрик гуфта, барои ҳар яки Шумо саломатӣ, саодати зиндагӣ ва муваффақиятҳои нав орзумандам. Рӯзи Парчами давлатии Ҷумҳурии Тоҷикистон муборак бошад!
