35 СОЛИ ИСТИҚЛОЛ: ТОҶИКИСТОН ДАР ОСТОНАИ МАРҲИЛАИ НАВИ РУШД

(Ба ифтихори 35 - солагии Истиқлоли давлатии Ҷумҳурии Тоҷикистон) Замони соҳибистиқлолии давлатӣ барои Тоҷикистон давраи ташаккул, озмоиш ва худшиносии миллӣ маҳсуб меёбад. Аз лаҳзаи ба даст овардани истиқлолият дар соли 1991 то имрӯз кишвар роҳи…

(Ба ифтихори 35 - солагии Истиқлоли давлатии Ҷумҳурии Тоҷикистон)

Замони соҳибистиқлолии давлатӣ барои Тоҷикистон давраи ташаккул, озмоиш ва худшиносии миллӣ маҳсуб меёбад. Аз лаҳзаи ба даст овардани истиқлолият дар соли 1991 то имрӯз кишвар роҳи пурпечутобро тай намуда, аз як ҷомеаи гирифтори буҳрон ба давлати устувору рӯ ба рушд табдил ёфтааст. Имрӯз, дар остонаи марҳилаи нави рушд, Тоҷикистон бо таҷрибаи андӯхта, захираҳои мавҷуда ва сиёсати дурандешона ба сӯи ояндаи боз ҳам дурахшон қадам мегузорад.

Дар ибтидои истиқлолият кишвар бо мушкилоти ҷиддии буҳрони сиёсӣ, ҷанги шаҳрвандӣ ва таназзули иқтисодӣ рӯ ба рӯ гардид. Дар чунин шароити мураккаб нақши таърихии Пешвои миллат муҳтарам Эмомалӣ Раҳмон ҳамчун роҳбари давлат муҳим буд.

Сарвари давлат тавонистанд бо иродаи қавӣ ва сиёсати хирадмандона кишварро аз вартаи нобудӣ наҷот дода, заминаи сулҳ ва ваҳдати миллиро фароҳам созад. Маҳз ҳамин сулҳу субот пояи асосии ҳамаи дастовардҳои минбаъдаи кишвар гардид.

Бо барқарор гардидани субот, Тоҷикистон ба марҳилаи бунёд ва рушд ворид шуд. Дар ин давра, ҳадафҳои стратегии миллӣ - таъмини истиқлолияти энергетикӣ, раҳоӣ аз бунбасти коммуникатсионӣ ва таъмини амнияти озуқаворӣ муайян гардиданд. Дар натиҷаи татбиқи пайгиронаи ин ҳадафҳо, кишвар ба пешрафтҳои назаррас ноил гардид. Сохтмони неругоҳҳои барқи обӣ, роҳҳо ва нақбҳо, рушди соҳаи кишоварзӣ ва саноат Тоҷикистонро ба як кишвари рӯ ба тараққӣ табдил дод.

Имрӯз, пас аз 35 соли истиқлолият, Тоҷикистон дар остонаи марҳилаи нави рушд қарор дорад. Ин марҳила бо хусусиятҳои нав, чун саноатикунонии босуръат, рақамикунонии иқтисод, рушди технологияҳои муосир ва таҳкими сармояи инсонӣ фарқ мекунад. Давлат ба рушди саноат ҳамчун самти афзалиятнок таваҷҷуҳи махсус зоҳир намуда, барои таъсиси корхонаҳои истеҳсолӣ ва зиёд намудани ҷойҳои корӣ тадбирҳои зарурӣ меандешад.

Яке аз самтҳои муҳими марҳилаи нав ин рушди иқтисоди рақамӣ мебошад. Ҷорӣ намудани технологияҳои иттилоотӣ, рушди хизматрасониҳои электронӣ ва ташаккули инфрасохтори рақамӣ имконият медиҳанд, ки Тоҷикистон ба иқтисоди ҷаҳонӣ бештар ҳамгиро шавад. Дар баробари ин, таваҷҷуҳ ба соҳаи маориф ва илм барои омода намудани мутахассисони рақобатпазир аҳамияти калидӣ дорад.

Дар марҳилаи нави рушд, инчунин масъалаҳои экологӣ ва истифодаи оқилонаи захираҳои табиӣ аҳамияти бештар пайдо мекунанд. Тоҷикистон ҳамчун кишвари дорои захираҳои бузурги обӣ метавонад дар таъмини рушди устувори минтақа нақши муҳим бозад. Ташаббусҳои байналмилалии кишвар дар соҳаи об нишон медиҳанд, ки Тоҷикистон на танҳо дар дохил, балки дар сатҳи ҷаҳонӣ низ мавқеи фаъол дорад.

Ҳамзамон, рушди фарҳанг ва ҳифзи арзишҳои миллӣ дар ин марҳила аҳамияти хоса касб мекунад. Ҷашни Наврӯз ва дигар суннатҳои миллӣ ҳамчун унсурҳои муҳими ҳувияти миллӣ ба таҳкими худшиносии ҷомеа мусоидат менамоянд. Дар баробари пешрафти технологӣ, ҳифзи арзишҳои фарҳангӣ барои нигоҳ доштани симои миллӣ ниҳоят муҳим аст.

Бо такя ба таҷрибаи гузашта ва имкониятҳои мавҷуда, Тоҷикистон имрӯз омода аст, ки ба марҳилаи нави рушд ворид шавад. Ин марҳила на танҳо идомаи роҳи тайшуда, балки оғози як давраи сифатан нав дар рушди кишвар мебошад. Бо роҳбарии хирадмандонаи Пешвои миллат муҳтарам Эмомалӣ Раҳмон ва дастгирии мардуми кишвар, Тоҷикистон метавонад ба дастовардҳои боз ҳам бузург ноил гардад.