14 сентябри соли 2026 дар Агентии омори назди Президенти Ҷумҳурии Тоҷикистон вохӯрии Директори Агентӣ Ҷамшед Нурмаҳмадзода бо Намояндаи доимии Хазинаи байналмилалии асъор (ХБА) дар Ҷумҳурии Тоҷикистон Ғазӣ Шбайкат баргузор гардид.
Зимни вохӯрӣ ҷонибҳо сатҳи кунунии ҳамкориҳоро мусбат арзёбӣ намуда, омодагии худро барои идомаи ҳамкориҳо ва густариши робитаҳои касбӣ ва техникӣ баён карданд.
Директори Агентӣ барои дастгирии пайвастаи ХБА дар самти рушди омори расмӣ, аз ҷумла расонидани ёрии техникӣ, ҷалби коршиносони байналмилалӣ ва такмили ихтисоси кормандон, изҳори сипос намуд. Таъкид гардид, ки идомаи омӯзиш ва бозомӯзии мутахассисон барои баланд бардоштани сатҳи касбӣ ва истифодаи таҷрибаи пешқадами байналмилалӣ аҳамияти муҳим дорад.
Ҷонибҳо ба масъалаи такмили Системаи ҳисобҳои миллии Ҷумҳурии Тоҷикистон таваҷҷуҳи махсус зоҳир намуда, зарурати идомаи дастгирии техникии ХБА, гузаронидани миссияҳои коршиносӣ ва баланд бардоштани сифати ҳисобҳои макроиқтисодиро муҳим арзёбӣ карданд.
Ҳамзамон, масъалаҳои мубодилаи мунтазам ва саривақтии маълумоти иқтисодӣ ва оморӣ баррасӣ гардиданд. Намояндаи доимии ХБА зарурати дастрасӣ ба маълумоти пурра, босифат, боэътимод ва саривақтиро барои таҳлил ва арзёбии вазъи иқтисодии кишвар таъкид намуд. Дар ин робита, Директори Агентӣ омодагии онро барои идомаи пешниҳоди маълумоти зарурии оморӣ ва нишондиҳандаҳои макроиқтисодӣ дар доираи ваколатҳои худ иброз дошт.
Инчунин, масъалаҳои таҳкими иқтидори институтсионалӣ, автоматикунонии равандҳои ҷамъоварӣ ва коркарди маълумот, истифодаи технологияҳои муосир, такмили усулҳои ҳисобкунӣ ва беҳтар намудани паҳн ва дастрасии маълумоти оморӣ мавриди баррасӣ қарор гирифтанд.
Дар фарҷоми вохӯрӣ ҷонибҳо изҳори қаноатмандӣ намуда, омодагии худро барои идомаи ҳамкории самаранок, густариши дастгирии техникӣ ва татбиқи ташаббусҳои муштарак ҷиҳати рушди минбаъдаи низоми миллии омори Ҷумҳурии Тоҷикистон баён карданд.
