Муовини якуми Директори Агентии омори назди Президенти Ҷумҳурии Тоҷикистон Асо Нурулло Асват дар Форуми байналмилалии “Рақамикунонии низоми миллии омор”, ки давоми ду рӯз дар шаҳри Остонаи Ҷумҳурии Қазоқистон баргузор гардид, ширкат ва суханронӣ намуд.
Дар ин ҳамоиш роҳбарони мақомоти омори беш аз понздаҳ кишвари ҷаҳон ва намояндагони ташкилотҳои байналмилалӣ иштирок ва масъалаҳои вобаста ба рақамикунонӣ ва тағйири раванди коркарди маълумоти омориро мавриди баррасӣ қарор доданд.
Асо Нурулло Асват зимни суханронии хеш ба иштирокдорон аз раванди рақамикунонии низоми омори миллӣ дар Тоҷикистон ва таҷрибаҳои дар ин самт андӯхташуда иттилоъ дода, таъкид намуд, ки рақамикунонӣ бешак эътимоди ҷомеаро ба омори расмӣ меафзояд ва ба раванди коркарди маълумот тағйироти куллӣ ворид мекунад.
Бояд гуфт, ки форуми мазкур ба 105-солагии таъсисёбии мақомоти омори давлатии Қазоқистон бахшида шуда, бо дастгирии Кумитаи омори ИДМ баргузор гардид.
