Ҳамватанон ва кишоварзони азиз! Шуморо ба муносибати фарорасии Соли нави мелодии 2026 табрику муборакбод менамоям. Боз як соли азму субот ва бурдбориҳо ба охир расида, дар саҳифаи таърихи миллати тоҷик сабт гардид. Мо бо ҳазорон орзую таманниёти нек…
Ҳамватанон ва кишоварзони азиз!
Шуморо ба муносибати фарорасии Соли нави мелодии 2026 табрику муборакбод менамоям.
Боз як соли азму субот ва бурдбориҳо ба охир расида, дар саҳифаи таърихи миллати тоҷик сабт гардид. Мо бо ҳазорон орзую таманниёти нек соли нави мелодии 2026-ро пешвоз мегирем ва қадамашро хайру ҳумоюн медонем.
Чун анъана ҳар ҷомеа бо фарорасии Соли нави мелодӣ ба саргузашти яксолаи хеш назар афканда, падидаҳои муҳимро таҳлилу баррасӣ менамояд ва хулоса мебарорад, ки дар соли рафта чӣ нақше аз худ ба ёдгор гузошт ва дар китоби ҳастии миллат чиҳо нигошт.
Агар ба роҳи сипарикардаи мардуми кишвари соҳибистиқлоламон назар афканем, возеҳу равшан мебинем, ки соли 2025 соли бобарори татбиқи сиёсати созандагию бунёдкорӣ, иқдому ташаббусҳои наҷиб ва вусъатёбии раванди худшиносиву худогоҳии миллии мардуми мо буд.
Тоҷикистони маҳбубу соҳибистиқлоли мо дар роҳи татбиқи ҳадафҳои стратегии худ қадамҳои устувор ба пеш гузошт. Бо дастур ва роҳнамоии Асосгузори сулҳу ваҳдати миллӣ, Пешвои муаззами миллат муҳтарам Эмомалӣ Раҳмон сиёсати созандагию бунёдкорӣ собитқадамона дар амал татбиқ гардида, тараққиёти иқтисодию иҷтимоии ҷумҳурӣ ба зинаҳои нави пешрафт расид. Маҳз ба иҷрои яке аз ҳадафҳои стратегӣ – таъмини амнияти озуқавории мамлакат ва рушди соҳа тамоми кишоварзони ҷумҳурӣ саҳми арзандаи хешро гузоштанд.
Маврид ба ёдоварист, ки Пешвои муаззами миллат дар Паёми навбатии худ ба Маҷлиси Олии Ҷумҳурии Тоҷикистон соҳаи кишоварзиро дар мадди назар гузошта аз афзоиши истеҳсоли маҳсулот ба кишоварзони мамлакат изҳори сипос намуданд, ки ин аз саҳми назаррасу хизмати шабонарӯзии кулли кишоварзони мамлакат шаҳодат медиҳанд.
Қайд намуданд, ки “Бо вуҷуди тағйирёбии иқлим, аз ҷумла ҳарорати баланди ҳаво соли 2025 дар натиҷаи заҳмати софдилонаи кишоварзони мамлакат суръати рушди соҳаи кишоварзӣ ба 8,5 фоиз расида, фаровонии бозори истеъмолӣ таъмин карда шуд.
Ҳамчунин, сатҳи ҳифзи амнияти озуқаворӣ аз 60 фоизи соли 2015 то 85 фоиз дар соли 2025 зиёд гардид.
Яъне кишоварзони мамлакат, хусусан, дар шароити номусоиди обу ҳавои соли ҷорӣ, аз ҷумла хокборишҳои шадид софдилона заҳмат кашида, бозори истеъмолиро бо маҳсулот таъмин карда истодаанд.
Бинобар ин, ба ҳамаи кишоварзон, деҳқонон, мутахассисони соҳа ва аҳолӣ, ки бо заҳмати содиқонаву ватандӯстона ва истифодаи оқилонаи обу замин маҳсулоти ғизоӣ истеҳсол мекунанд, сипосу миннатдорӣ баён менамоям."
Ин баҳои арзанда ва изҳори самимии Пешвои муаззами миллат мо кишоварзони мамлакатро водор менамояд, ки аз ҳарвақта дида бештар кору фаъолият намоем, дар иҷрои кору вазифа масъулиятшинос бошем ва ҳар як порча замини зархези Тоҷикистони азизамонро мақсадноку самаранок истифода бурда, истеҳсоли ҳама намуди маҳсулотро аз нақша зиёд иҷро намоем, дар таъмини сабади истеъмолии мардум, дастархони пурнозу неъмати аҳолӣ саҳм гузорем ва дар содироти маҳсулоти аз ҷиҳати экологӣ тозаи Тоҷикистон ба хориҷи мамлакат тадбирҳои зарурӣ андешем.
Мо ба соли нави мелодии 2026 қадам гузошта, чун анъана дар назди худ вазифаҳои нав мегузорем, корҳои зиёди ободонию бунёдкорӣ ва созандагиро оғоз кардаем ва амалӣ гардидани онҳоро маҳаки асосии фаъолияти кории худ қарор дода умедворем, ки онҳоро дар муҳлатҳои муқарраршуда бо сари баланд ба анҷом мерасонем.
Бо чунин ниятҳои нек ба ҳар сокини Ватани азизамон ва кишоварзон, тансиҳатӣ, умри дароз, рӯзгори ободу осуда, муваффақиятҳои доимӣ ва барои Тоҷикистони маҳбубамон сулҳу ваҳдат ва истиқлолияти пойдорро таманно дорам.
Соли нави мелодии 2026 муборак бошад ҳамватанон ва кишоварзони азиз!
