Санаи 6-уми ноябри соли ҷорӣ дар ҳошияи сафари кории Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Иёлоти Муттаҳидаи Амрико дар шаҳри Вашингтон мизи мудаввари сатҳи баланд оид ба ҳамкории соҳибкорӣ миёни Ҷумҳурии Тоҷикистон ва ИМА баргузор гардид.
Дар чорабинӣ роҳбарони сохторҳои давлатӣ ва намояндагони доираҳои соҳибкориву сармоягузории ду кишвар иштирок намуда, дурнамо ва рушди имкониятҳои ҳамкории сармоягузорӣ, аз ҷумла ҷалби сармояи мустақими хориҷӣ ва татбиқи лоиҳаҳои муштарак дар соҳаҳои энергияи «сабз», саноати коркард, масолеҳи сохтмонӣ ва комплекси агросаноатӣ баррасӣ гардид.
Дар фарҷоми чорабинӣ миёни доираҳои соҳибкорию сармоягузори ду кишвар як қатор ҳуҷҷатҳои ҳамкорӣ ба имзо расид, ки барои таҳкими робитаҳои иқтисодиву сармоягузории дуҷониба заминаҳои нав фароҳам меорад.
