24 сентябри соли 2026 дар шаҳри Урумчӣ ҳайати Ҷумҳурии Тоҷикистон таҳти роҳбарии муовини вазири рушди иқтисод ва савдо Насриддинзода Рухшона Ҳикматулло бо намояндагони роҳбарияти мақомоти дахлдори ноҳияи Мухтори Синзян-Уйғури Ҷумҳурии Мардумии Чин оид ба масъалаҳои ҳамкории тиҷоратию иқтисодӣ ҷаласаи муштарак баргузор намуд.
Дар рафти ҷаласа ҷонибҳо доираи васеи масъалаҳои мавриди таваҷҷуҳи тарафайнро, ки ба тавсеаи минбаъдаи робитаҳои тиҷоратию иқтисодии байни Ҷумҳурии Тоҷикистон ва ноҳияи Мухтори Синзян -Уйғури Ҷумҳурии Мардумии Чин равона шудаанд, мавриди баррасӣ қарор доданд.
Таваҷҷуҳи махсус ба диверсификатсияи савдои мутақобила, васеъ намудани номгӯи маҳсулоти содиротии Тоҷикистон ба бозори Чин, тақвияти ҳамкорӣ дар самти талаботи санитарию фитосанитарӣ, стандартизатсия ва сертификатсияи маҳсулот, инчунин бартараф намудани омилҳои боздорандаи рушди минбаъдаи савдои мутақобила зоҳир карда шуд.
Ҳамзамон, ҷонибҳо ҳавасмандии худро ҷиҳати рушди минбаъдаи инфрасохтори нақлиётию логистикӣ, таъсис ва навсозии марказҳои нақлиётию логистикӣ, баланд бардоштани самаранокии ҳамлу нақли бор ва таҳкими пайвастагии нақлиётӣ изҳор намуданд.
Дар ҷаласа ба тавсеаи ҳамкории сармоягузорӣ ва ҷалби сармояи мустақими хориҷӣ, аз ҷумла ба татбиқи лоиҳаҳо дар соҳаҳои иқтисоди «сабз», манбаъҳои барқароршавандаи энергия ва дигар самтҳои ояндадор низ таваҷҷуҳи махсус зоҳир гардид.
Дар натиҷаи ҷаласа ҷонибҳо самтҳои афзалиятноки ҳамкории минбаъдаро муайян намуда, рӯзномаи ҷаласаи навбатии Зеркомиссияи Тоҷикистон ва ноҳияи Мухтори Синзян-Уйғури Ҷумҳурии Мардумии Чин оид ба ҳамкории тиҷоратию иқтисодиро ташаккул доданд.
Ҷонибҳо омодагии худро барои идомаи ҳамкории зич ҷиҳати татбиқи амалии тавофуқоти бадастомада ва таҳкими минбаъдаи ҳамкории мутақобилан судманди тиҷоратию иқтисодӣ ва сармоягузорӣ таъкид намуданд.
