15 июли соли 2026 Вазири рушди иқтисод ва савдо Абдураҳмонзода Абдураҳмон Сафаралӣ дар чорабинии муштараки сатҳи баланд таҳти унвони «Зеҳни сунъӣ ва рушди устувор: навоварӣ, фарогирӣ ва устуворӣ», ки дар шаҳри Ню-Йорк баргузор гардид, иштирок ва суханронӣ намуд.
Зимни суханронии худ Вазири рушди иқтисод ва савдо қайд намуд, ки бо дастуру ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон солҳои 2025–2030 «Солҳои рушди иқтисоди рақамӣ ва инноватсия» эълон гардида, Тоҷикистон нахустин кишвари Осиёи Марказӣ мебошад, ки Стратегияи миллии рушди зеҳни сунъӣ барои давраи то соли 2040-ро қабул намудааст.
Инчунин бо ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Маҷмаи Умумии Созмони Милали Муттаҳид қатъномаи «Нақши зеҳни сунъӣ дар фароҳам овардани имкониятҳои нав барои рушди устувор дар Осиёи Марказӣ»-ро қабул намуд.
Ҳамзамон таъкид гардид, ки зеҳни сунъӣ ба татбиқи Ҳадафҳои рушди устувор, баланд бардоштани самаранокии идоракунии давлатӣ ва таъмини рушди фарогири иқтисодӣ мусоидат менамояд.
Чорабинии мазкур ба густариши ҳамкориҳо, ҷалби сармоягузорӣ ва маблағҳои грантӣ барои татбиқи лоиҳаҳои инноватсионӣ дар самти зеҳни сунъӣ мусоидат хоҳад кард.
