1 майи соли 2026 дар Вазорати рушди иқтисод ва савдо вохӯрии Вазири рушди иқтисод ва савдо Абдураҳмонзода Абдураҳмон Сафаралӣ бо роҳбари миссияи Хазинаи байналмилалии асъор (ХБА) оид ба Тоҷикистон Мэтю Гартнер ва ҳайати он баргузор гардид.
Дар вохӯрӣ масъалаҳо оид ба таҳкими ҳамкориҳо дар самтҳои афзалиятнок, аз ҷумла татбиқи ҳуҷҷатҳои банақшагирии стратегӣ, мукамалгардонии низоми дурнамосозӣ, пешгирии таъсири хавфҳои эҳтимолӣ ва таъмини устувории нишондиҳандаҳои макроиқтисодӣ мавриди баррасии ҷонибҳо қарор дода шуданд.
Абдураҳмонзода А. С. қайд намуд, ки дар моҳҳои январ-марти соли 2026 новобаста аз вазъи мураккаби иқтисоди ҷаҳон дар натиҷаи иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва тадбирҳои андешидаи Ҳукумати кишвар суръати рушди иқтисоди миллӣ 8 фоизро ташкил дод.
Зимни мулоқот Мэтю Гартнер устувории нишондиҳандаҳои макроиқтисодӣ ва дастовардҳои иқтисодии ноилгардидаи Тоҷикистонро дар соли 2025 ва се моҳи аввали соли 2026 мусбӣ арзёбӣ намуда, қайд кард, ки новобаста аз таъсири омилҳои беруна солҳои охир рушди иқтисодии кишвар дар сатҳи баланд таъмин гардида истодааст.
Дар анҷоми мулоқот ҷонибҳо омодагии худро барои густариши минбаъдаи ҳамкориҳои мутақобилан судманд изҳор намуданд.
