Намояндаи Агентии Тоҷикстандарт дар семинари байналмилалӣ дар Ҷумҳурии Мардумии Чин иштирок намуд
Бо мақсади омӯзиши таҷрибаи пешқадами байналмилалӣ дар самти соддагардонии расмиёти гумрукӣ ва рушди савдои хориҷӣ, мутахассиси шуъбаи сертификатсияи маҳсулоти Раёсати бањодињии мутобиќати Агентии Тољикстандарт Раҳимов Акбарљон аз 9 то 22 июли соли 2026 дар семинари байналмилалии омӯзишӣ оид ба сертификатсияи операторони ваколатдори иқтисодӣ (Authorized Economic Operator - AEO), ки дар шаҳри Чанҷоуи музофоти Тсзянсии Ҷумҳурии Мардумии Чин баргузор гардид, иштирок намуд.
Семинари мазкур аз ҷониби Вазорати тиҷорати Ҷумҳурии Мардумии Чин дар доираи ташаббуси байналмилалии «Як камарбанд - як роҳ» ва дар ҳамкорӣ бо Донишкадаи сифати санҷиш ва карантини музофоти Тсзянсӣ (JSIQ) ташкил гардида, дар он намояндагони Ҷумҳурии Тоҷикистон, аз ҷумла, аз Дастгоҳи иҷроияи Президенти Ҷумҳурии Тоҷикистон, Кумитаи андоз, Хадамоти гумрук ва Агентии Тоҷикстандарт иштирок намуданд.
Дар ҷараёни семинар иштирокчиён аз ҷониби профессорону коршиносони муассисаҳои таҳсилоти олии Ҷумҳурии Мардумии Чин ва намояндагони мақомоти гумруки ин кишвар бо масъалаҳои муҳими татбиқи низоми Оператори ваколатдори иқтисодӣ (AEO), идоракунии хавфҳои гумрукӣ, гумруки интеллектуалӣ (Smart Customs), рақамикунонии расмиёти гумрукӣ ва рушди ҳамкориҳои байналмилалӣ шинос шуданд.
Зикр гардид, ки низоми AEO яке аз механизмҳои муҳими байналмилалӣ ба ҳисоб рафта, ба таъмини амнияти занҷираи таъминот, содагардонии расмиёти гумрукӣ ва рушди тиҷорати байналмилалӣ мусоидат менамояд. Дар доираи ин низом операторони иқтисодии боэътимод аз як қатор имтиёзҳо, аз ҷумла, коҳиш додани санҷишҳои гумрукӣ, афзалият ҳангоми барасмиятдарорӣ ва мубодилаи электронии маълумот бархӯрдор мегарданд.
Ҳамзамон, дар доираи барномаи омӯзишӣ барои иштирокчиён боздидҳои амалӣ аз як қатор корхонаҳои истеҳсолӣ ва ташкилотҳои содиротию воридотии Ҷумҳурии Мардумии Чин ташкил карда шуд. Аз ҷумла, онҳо бо фаъолияти ширкати «Jiangxi Xinko Technology Co., Ltd.», ки яке аз корхонаҳои пешрафтаи баландтехнологии Чин мебошад, шинос шуда, таҷрибаи рақамикунонии равандҳои истеҳсолӣ, автоматикунонии назорати сифати маҳсулот ва ҳамгироии низомҳои истеҳсолӣ ва муҳосибиро омӯхтанд.
Таҷрибаи Ҷумҳурии Мардумии Чин нишон медиҳад, ки татбиқи самараноки низоми AEO ба баланд гардидани сатҳи риояи қонунгузории гумрукӣ, коҳиш ёфтани вақти барасмиятдарорӣ, рушди савдои хориҷӣ, афзоиши рақобатпазирии соҳибкорон ва таҳкими ҳамкориҳои байналмилалӣ мусоидат мекунад.
Дар анҷоми семинари омӯзишӣ ба ҳамаи иштирокчиён барои иштироки фаъолона сертификат супорида шуд.
Тазаккур бояд дод, ки иштирок дар чунин семинарњо барои такмили дониш ва малакаи касбии мутахассисони Агентии Тоҷикстандарт ва омӯзиши таҷрибаи пешқадами байналмилалӣ заминаи мусоид фароҳам меорад.
