Соли ҷорӣ дар доираи татбиқи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба тақвияти истеҳсолоти воридотивазкунанда ва рушди содирот, таъмин намудани бозори истеъмолӣ бо молҳои баландсифат ва рақобатпазири ватанӣ, мусоидат ба саноатикунонии босуръати кишвар ва беҳтар намудани сифати хизматрасонӣ аз ҷониби Агентии Тоҷикстандарт гузаронидани Озмуни «Маҳсулот ва хизматрасонии беҳтарин дар Ҷумҳурии Тоҷикистон» ба нақша гирифта шуд. Дар робита ба ин, фармоиши директори Агентии Тоҷикстандарт ба имзо расонида шуда, тибқи он низомнома ва нақша чорабиниҳои озмун тасдиқ гардида, дар асоси он комиссияи вилоятию минтақавӣ ва ҷумҳуриявии озмун таъсис ёфт.
Тайи чанд моҳ, аз моҳи март то моҳи май корҳои тарғиботӣ ва фаҳмондадиҳӣ оғоз гашта, ҷиҳати иштирок ба озмуни мазкур дар миқёси ҷумҳурӣ, дар маҷмӯъ, 364 корхона ва ташкилоти хизматрасон дархост пешниҳод намудаанд. Озмун дар ду давра гузаронида шуда, моҳи август даври вилоятию минтақавӣ ба анҷом расида, даври ҷумҳуриявӣ моҳи сентябр ба итмом расид ва аз шумораи дархосткунандагон 119 корхонаю ташкилот дар натиҷаи баҳогузорӣ дар номинатсияҳои маҳсулоти хӯрокворӣ, маҳсулоти саноатӣ таъйиноти истеҳсолию-техникӣ, маснуоти ҳунарҳои мардумӣ ва хизматрасонии хӯроки умумию нуқтаҳои савдо ғолибони озмун гардиданд. Бояд гуфт, ки яке аз нишондоди баҳогузорӣ барои истеҳсоли маҳсулоти беҳтарин дар корхонаҳои саноатӣ ин ҷорӣ намудани стандартҳои байналмилалӣ дар фаъолияти корхонаҳо буд.
Вобаста ба ин, санаи 27 сентябри соли равон дар намоишгоҳи Dushanbe EXPO Centre, воқеъ дар шаҳри Душанбе, кӯчаи Низомии Ганҷавӣ дар доираи нақшаи баргузории Озмуни мазкур намоиши молу маҳсулоти саноатӣ, ҳунарҳои мардумӣ ва хизматрасонии беҳтарини корхонаю ташкилотҳое, ки аз ҷониби комиссияи ҷумҳуриявӣ ғолибони озмун муайян гаштанд, баргузор гардид.
Ҳадаф аз ин чорабиниҳо пеш аз ҳама мусоидат ба рушди устувор ва ҳамгироии иқтисодии ватанӣ бо мақсади баланд бардоштани сатҳи некӯаҳволии мардум мебошад. Ҳамзамон, амали мазкур ба муаррифии имкониятҳои истеҳсолии корхонаҳои ватанӣ нигаронда шудааст.
Тибқи нақша имрӯз аз намоишгоҳи озмун боздид ба амал оварда шуд ва маросими ҷоизасупорӣ ба ғолибони озмун, ба ифтихори Рӯзи соҳибкорон ва Рӯзи байналмилалии стандартҳо санаи 14 октябри соли 2025 баргузор хоҳад гашт.
