Вакили Маҷлиси намояндагони Маҷлиси Олии Ҷумҳурии Тоҷикистон Саидӣ Дилафрӯз дар кори Ассамблеяи 152-юми Иттиҳоди байнипарламентӣ (ИБП) ва иҷлосияи 41-уми Форуми занони вакил, ки дар шаҳри Истамбули Ҷумҳурии Туркия ҷараён дорад, иштирок намуда, зимни кори гурӯҳи аввал оид ба таҳкими сулҳ ва идоракунӣ, таҷрибаи кишвар дар истиқрори сулҳ ва нақши калидии занон дар эҷоди механизми самарабахши идоракунӣ дар давраи баъдинизоӣ сухан гуфт.
Мавсуф, дар муҳокимаҳои гурӯҳи дуюм оид ба иқтисоди устувор, муҳиммияти дастрасии баробари занон ба захираҳои молиявӣ ва ҳимояи манфиатҳои соҳибкории хурду миёна изҳори назар намуд.
Таъкид гардид, ки дар Тоҷикистон бо ташаббусҳои Президенти кишвар - Пешвои миллат муҳтарам Эмомалӣ Раҳмон нақши занон дар мақомоти давлатӣ ва қонунгузорӣ сол ба сол боло меравад ва ин таҷриба метавонад барои дигар давлатҳои узви ИБП ҷолиб бошад.
Иштироки намояндагони Парламенти Тоҷикистон дар чунин ҳамоиши сатҳи баланд боз як нишонаи таҳкими дипломатияи парламентӣ ва саҳми кишвар дар ҳалли масъалаҳои глобалӣ мебошад.
