23 декабри соли 2025 бо мақсади шарҳу тавзеҳи Паёми навбатии Президенти Ҷумҳурии Тоҷикистон муҳтарам Эмомалӣ Раҳмон “Дар бораи самтҳои асосии сиёсати дохилӣ ва хориҷии Ҷумҳурии Тоҷикистон” вохӯрии вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи интихоботии якмандатаи Айнӣ №22 — Давлатзода Қиёмиддин бо интихобкунандагони Ҷамоати деҳоти «Дар-Дар» баргузор гардид.
Дар вохӯрӣ раиси Кумитаи иҷроияи ҲХДТ дар ноҳияи Айнӣ Боқизода Боқимуҳаммад, раиси Ҷамоати деҳоти «Дар-Дар» Ҳоҷизода Саъдӣ, омӯзгорон, собиқадорон, ҷавонон, фаъолон ва сокинони ҷамоати мазкур иштирок намуданд.
Нахуст, Боқизода Боқимуҳаммад бо сухан баромада иброз дошт, ки Паёми навбатии Пешвои миллат ҳамчун санади муҳимми стратегӣ самтҳои асосии рушди устувори кишварро муайян намуда, барои таҳкими истиқлолият, ваҳдати миллӣ ва пешрафти иҷтимоию иқтисодии Тоҷикистон заминаи боэътимод фароҳам меорад. Ӯ аҳаммияти сиёсати созанда ва иқдомҳои бунёдкоронаи Раиси муаззами ҲХДТ, Пешвои миллат муҳтарам Эмомалӣ Раҳмонро махсус таъкид кард.
Вакили мардумӣ Давлатзода Қиёмиддин бо гузориши муфассал доир ба Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон, ки санаи 16 декабри соли 2025 ироа гардид, ба иштирокдорон маълумот манзур намуд. Зимни суханронии худ зикр намуд, ки Паёми Пешвои миллат фарогири масъалаҳои калидии давлатдорӣ, аз ҷумла рушди иқтисоди миллӣ, саноатикунонии босуръат, таъмини амнияти энергетикӣ, рақамикунонии иқтисод, таҳкими соҳаҳои маорифу тандурустӣ, дастгирии ҷавонон ва баланд бардоштани сатҳи некуаҳволии мардум мебошад.
Дар анҷоми мулоқот интихобкунандагон бо пешниҳодҳо ва дархостҳои худ ба вакили мардумӣ муроҷиат намуда, посухҳои қонеъкунанда гирифтанд. Вохӯриҳо бо интихобкунандагон идома доранд.
