Имрӯз Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба корҳои байналмилалӣ, иттиҳодияҳои ҷамъиятӣ ва иттилоот Гулзода Маҳмадшоҳ бо Раиси Кумитаи Думаи давлатии Федератсияи Россия оид ба корҳои ИДМ, ҳамгироии авруосиё ва робита бо ҳамватанон Леонид Калашников мулоқот намуд.
Зимни мулоқот оид ба тавсеаи ҳамкориҳои байнипарламентӣ, таҳкими заминаҳои қонунгузорӣ ва масъалаҳои марбут ба муҳоҷирати меҳнатӣ мубодилаи афкор сурат гирифт.
Таъкид шуд, ки ҳамкориҳо, пеш аз ҳама, бар асоси принсипҳои эътирофшудаи байналмилалӣ, — баробарҳуқуқии давлатҳо, иҷрои софдилонаи уҳдадориҳо, эҳтироми ҳуқуқ ва озодиҳои инсон ва шаҳрванд сурат мегирад.
Айни ҳол робитаҳои байни ду кишвар бар асоси созишномаҳои байналмилалӣ ба роҳ монда шудаанд, ки ин заминаи муҳимми таъмини самаранокии ҳамкориҳои дуҷонибаро фароҳам меорад.
Таҳкими ҳамкориҳои байнипарламентӣ тавассути муколама, вохӯриҳои мунтазам ва иштироки фаъол дар чорабиниҳои дуҷониба, ҳамчунин густариши минбаъдаи ҳамкориҳо дар доираи созмонҳои байналмилалӣ, аз ҷумла СММ, Иттиҳоди байнипарлумонӣ ва ИДМ муҳим арзёбӣ гардид.
Мулоқот дар ҳошияи баргузории ҷаласаи 59 - уми пленарии Ассамблеяи Байнипарламентии давлатҳои иштирокдори ИДМ дар шаҳри Душанбе сурат гирифт.
