Имрӯз дар Маҷлиси намояндагони Маҷлиси Олии Ҷумҳурии Тоҷикистон вохӯрии ҳайати Кумитаи Маҷлиси намояндагони Маҷлиси Олии Ҷумҳурии Тоҷикистон оид ба иқтисод ва молия бо намояндагони Хазинаи Байналмилалии Асъор (МВФ) баргузор гардид.
Дар ҷараёни вохӯрӣ ҷонибҳо масоили рушди устувори иқтисоди миллӣ, тақвияти суботи макроиқтисодӣ, ислоҳоти молиявӣ ва сиёсати буҷетиро мавриди баррасӣ қарор доданд.
Муовини раиси Кумита оид ба иқтисод ва молия Тоҳир Набизода иброз намуд, ки бо шарофати сиёсати хирадмандона ва созандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иқтисодиёти кишвар дар шароити мураккаби ҷаҳонӣ низ тавонист устуворӣ ва тавонмандии рушди худро нигоҳ дорад. Суръати миёнаи рушди иқтисоди миллӣ дар чанд соли охир аз сатҳи миёнаи минтақавӣ боло буда, ин аз самаранокии сиёсати давлат оид ба таҳкими интизоми молиявӣ, афзоиши сармоягузорӣ ва рушди бахшҳои калидии иқтисод шаҳодат медиҳад.
Таъкид гардид, ки Тоҷикистон айни ҳол ба марҳалаи нави табдили иқтисодӣ ворид мешавад.
Ҷонибҳо аҳаммияти ҳамкориро бо ХБА дар татбиқи ислоҳоти молиявӣ, таҳкими қобилияти институтсионалӣ, баланд бардоштани самаранокии сиёсати буҷетӣ ва андозбандӣ, инчунин густариши рақамикунонии хизматрасониҳои давлатӣ махсус таъкид намуданд.
Кумитаи Маҷлиси намояндагони Маҷлиси Олии оид ба иқтисод ва молияи Маҷлиси намояндагон нақши созандаи ХБА-ро дар тақвияти суботи макроиқтисодӣ, баланд бардоштани идоракунии молиявӣ ва дастгирии ислоҳоти иқтисодӣ баланд арзёбӣ намуд.
Дар фарҷом, ҷонибҳо изҳори итминон карданд, ки ҳамкории судманд миёни Ҷумҳурии Тоҷикистон ва Хазинаи Байналмилалии Асъор минбаъд низ ба таҳкими суботи иқтисодӣ ва рушди устувори кишвар мусоидат хоҳад кард.
