ЛЕВАКАНТ: ТАҚВИЯТИ КОРҲОИ ОБОДОНӢ БАХШИДА БА 35-СОЛАГИИ ИСТИҚЛОЛИЯТ

22-юми апрел, вакили Маҷлиси вакилони халқи шаҳри Левакант Адолати Маҳмадалӣ тибқи нақшаи корӣ ва дар доираи ташаббусҳои Ҳизби Халқии Демократии Тоҷикистон бо интихобкунандагони худ мулоқоти судманд анҷом дод.

Вохӯрӣ бо сокинони деҳаи Гулистон бо усули хона ба хона баргузор гардида, дар раванди он масъалаҳои муҳими иҷтимоӣ ва маърифатӣ мавриди баррасӣ қарор гирифтанд. Аз ҷумла, ба сокинон аҳамияти корҳои ободонию созандагӣ бахшида ба 35-солагии Истиқлолияти давлатии Тоҷикистон, истифодаи самараноки заминҳои наздиҳавлигӣ ва сарфакорона истифода бурдани неруи барқ фаҳмонда дода шуд.

Ҳамзамон, вакил дар суҳбат бо мардум оид ба пешгирии омилҳои номатлуб, аз қабили ҷинояткорӣ, хурофотпарастӣ, таълимоти ғайриқонунии диннӣ, бегонапарастӣ ва зиёдаравӣ таъкид намуда, зарурати риояи арзишҳои миллӣ, аз ҷумла худдорӣ аз пӯшидани либоси ба фарҳанги миллӣ бегона ва нигоҳдории тозагию ободонӣ дар хона ва маҳаллаҳоро муҳим арзёбӣ кард.

Қайд гардид, ки чунин корҳои таблиғотӣ қаблан низ баргузор гардида буданд ва имрӯз аллакай натиҷаҳои назаррас ба бор овардаанд. Сокинон ба таъмиру тармим ва рангубори манзилҳои худ оғоз намуда, барои ободу зебо гардонидани муҳити зист саҳмгузор шудаанд.

Дар маҷмӯъ, баргузории чунин мулоқотҳо ба баланд бардоштани маърифати шаҳрвандон ва таҳкими ҳисси масъулияти онҳо дар ободонии маҳал мусоидат менамояд.