ЛЕВАКАНТ: МУСОБИҚАИ САМБО – МАЙДОНИ РАҚОБАТ, НЕЪРӮ ВА МАҲОРАТ

10-уми апрел, дар шаҳри Левакант бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон мусобиқаи ҷумҳуриявӣ аз намуди гуштини самбо миёни наврасон ва ҷавонон дар сатҳи баланд баргузор гардид. Ин чорабинии муҳими варзишӣ варзишгарони боистеъдодро аз тамоми гӯшаву канори кишвар ба ҳам оварда, ба саҳнаи воқеии рақобати солим, дӯстӣ ва ҳамдигарфаҳмӣ табдил ёфт.

Мусобиқа дар фазои тантанавӣ оғоз гардида, дар он намояндагони мақомоти иҷроияи ҳокимияти давлатии шаҳри Левакант, масъулони соҳаи варзиш, аъзои Федератсияи самбо, мураббиёни соҳибтаҷриба ва ҳаводорони сершумори варзиш иштирок намуданд. Ҳузури чунин доираи васеи меҳмонон аз аҳамияти баланд ва мақоми махсус доштани ин мусобиқа дарак медод.

Дар рафти мусобиқа варзишгарон дар вазнҳои гуногун қувваозмоӣ намуда, маҳорати техникӣ, устувории равонӣ ва омодагии ҷисмонии худро нишон доданд. Ҳар як рақобат пуршиддат ва ҷолиб сурат гирифта, мухлисонро ба ҳаяҷон меовард. Варзишгарони ҷавон бо иродаи қавӣ ва талоши зиёд барои ба даст овардани ғалаба мубориза бурданд, ки ин худ нишонаи рушд ёфтани ин намуди варзиш дар кишвар мебошад.

Қобили зикр аст, ки дар ин мусобиқа дастпарварони Муассисаи давлатии мактаби варзишии шаҳри Левакант низ иштироки фаъолона намуда, бо нишон додани маҳорати баланд ба натиҷаҳои назаррас ноил гардиданд. Онҳо як ҷойи аввал ва се ҷойи сеюмро ба даст оварда, шарафи шаҳри худро ҳимоя карданд. Ин дастовардҳо гувоҳи онанд, ки дар Левакант ба рушди варзиш ва тарбияи варзишгарони ҷавон таваҷҷуҳи махсус зоҳир мегардад.

Мураббиёни варзида, ки дар тарбияи ин ҷавонон саҳми босазо доранд, аз чунин натиҷаҳо изҳори қаноатмандӣ намуда, зикр карданд, ки дастгирии пайваста ва фароҳам овардани шароити мусоид метавонад варзишгарони моро ба қуллаҳои баландтар расонад. Ҳамзамон, чунин мусобиқаҳо имконияти хубе барои дарёфти истеъдодҳои нав ва омодасозии варзишгарон ба мусобиқаҳои байналмилалӣ ба ҳисоб мераванд.

Дар анҷоми мусобиқа маросими ҷамъбастӣ бо шукӯҳу шаҳомати хоса баргузор гардида, ғолибон ва ҷоизадорон бо диплом, медал ва туҳфаҳои хотиравӣ аз ҷониби Кумитаи кор бо ҷавонон ва варзиш қадрдонӣ карда шуданд. Ин лаҳза барои варзишгарон хотирмон ва рӯҳбаландкунанда буд, зеро заҳмати онҳо ба таври шоиста арзёбӣ гардид.

Бояд гуфт, ки баргузории чунин мусобиқаҳо дар тарбияи насли ҷавон нақши муҳим дошта, онҳоро ба тарзи ҳаёти солим, ватандӯстӣ ва эҳтиром ба арзишҳои миллӣ раҳнамоӣ мекунад. Самбо, ҳамчун як намуди варзиши пурмазмун, на танҳо қувваи ҷисмонӣ, балки ирода, сабр ва зеҳни варзишгарро низ тақвият медиҳад.

Дар маҷмӯъ, мусобиқаи ҷумҳуриявии самбо дар шаҳри Левакант бо сатҳи баланди ташкилӣ ва иштироки фаъолонаи варзишгарон ба анҷом расида, бори дигар собит намуд, ки варзиш дар Тоҷикистон, махсусан миёни ҷавонон, рӯ ба рушд аст ва ояндаи дурахшон дорад.