Абдусатторзода Мубориз Ҷамшед, яке аз варзишгарони ҷавону умедбахши Муассисаи давлатии мактаби варзишии шаҳри Левакант, дар мусобиқаи ҷумҳуриявӣ аз намуди «Кембо» ба дастоварди назаррас ноил гардид. Мусобиқаи мазкур санаи 31-уми март дар шаҳри…
Абдусатторзода Мубориз Ҷамшед, яке аз варзишгарони ҷавону умедбахши Муассисаи давлатии мактаби варзишии шаҳри Левакант, дар мусобиқаи ҷумҳуриявӣ аз намуди «Кембо» ба дастоварди назаррас ноил гардид. Мусобиқаи мазкур санаи 31-уми март дар шаҳри Душанбе баргузор шуда, беҳтарин варзишгарон аз гӯшаву канори кишварро ба ҳам овард.
Мубориз Ҷамшед дар рафти мусобиқа маҳорати баланди касбӣ, иродаи қавӣ ва омодагии ҷисмонии хуб нишон дода, бар рақибони худ бартарӣ пайдо кард. Ӯ дар ҳамаи даврҳои рақобат бо нишондиҳандаҳои олӣ баромад намуда, сазовори ҷойи аввал гардид.
Бо ин дастоварди арзанда, варзишгари ҷавон на танҳо медали тилло ба даст овард, балки соҳиби камарбанди сиёҳ низ гардид, ки нишонаи сатҳи баланди маҳорат ва таҷрибаи ӯ дар ин намуди варзиш мебошад.
Муваффақияти Абдусатторзода Мубориз Ҷамшед натиҷаи заҳмати пайваста, тамринҳои ҷиддӣ ва дастгирии мураббиён арзёбӣ мегардад. Ин пирӯзӣ боз як далели рушду пешрафти варзиш дар шаҳри Левакант буда, метавонад барои дигар ҷавонон ҳамчун намунаи ибрат хизмат намояд.
Масъулони муассисаи давлатии мактаби варзишии шаҳр ва мураббиёни ӯ изҳори умедворӣ намуданд, ки Мубориз Ҷамшед дар мусобиқаҳои минбаъда низ парчами кишварро баланд бардошта, дастовардҳои нав ба даст меорад.
