Аз 22 то 24 апрел дар пойтахти Ҷумҳурии Қазоқистон, шаҳри Астана, Саммити минтақавии экологӣ (РЭС–2026) баргузор гардид, ки ба яке аз бузургтарин майдонҳои байналмилалӣ барои баррасии масъалаҳои рушди устувор ва тағйирёбии иқлим дар Осиёи Марказӣ табдил ёфт.
Дар кори саммит Президенти Ҷумҳурии Тоҷикистон, Пешвои миллат Эмомали Рахмон иштирок намуда, бо суханронӣ баромад карданд ва дар чорабиниҳои асосӣ ширкат варзиданд. Рӯзи 22 апрел ӯ ҳамроҳ бо сарони давлатҳо ва ҳайатҳои иштирокчӣ аз намоишгоҳи саммит дидан намуданд, ки дар он гӯшаи миллии Тоҷикистон низ муаррифӣ гардид.
Гӯшаи Тоҷикистон саҳми кишварро дар пешбурди рӯзномаи ҷаҳонии иқлим нишон дода, ба масъалаҳои муҳими обшавии пиряхҳо, ҳифзи гуногуншаклии биологӣ, беҳдошти муҳити зист, инчунин аҳамият ва афзалиятҳои гузариш ба иқтисоди «сабз» ва рушди экотуризм равона гардида буд. Ба меҳмонон ва намояндагони ҳайатҳо маълумоти муфассал оид ба ташаббусҳо ва афзалиятҳои кишвар дар ин самтҳо пешниҳод карда шуд.
Саммити минтақавии экологӣ–2026 зиёда аз 9500 иштирокчиро гирд овард. Дар доираи он тақрибан 60 чорабинӣ бо иштироки намояндагони ҳукуматҳо, созмонҳои байналмилалӣ, муассисаҳои молиявӣ, институтҳои рушд, бахши хусусӣ, ҷомеаи илмӣ ва ҷомеаи шаҳрвандӣ баргузор гардид.
Ҳамзамон бо РЭС Конфронси Осиёи Марказӣ оид ба тағйирёбии иқлим (ЦАКИК–2026) низ баргузор шуд, ки ҳамчун платформа барои баррасии механизмҳои ҳамкорӣ, татбиқи ҳалли инноватсионӣ ва мувофиқаи равишҳои минтақавӣ дар самти мутобиқшавӣ ба тағйирёбии иқлим ва баланд бардоштани устуворӣ хизмат намуд.
Аз ҷониби Кумитаи ҳолатҳои фавқулодаи назди Ҳукумати Ҷумҳурии Тоҷикистон дар саммит намояндагони Маркази идоракунии ҳолатҳои бӯҳронӣ, аз ҷумла генерал-майор Камолзода Ҷамшед Ҷамол ва подполковник Абдураҳимов Илҳом Нобоварович иштирок карданд.
24 апрел дар доираи саммит ҷаласаи муштараки ЮНЕСКО ва Фонди мутобиқшавӣ дар мавзӯи «Ҳамкорӣ дар соҳаи огоҳсозии барвақтӣ ва коҳиши хатари офатҳои табиӣ дар Осиёи Марказӣ» баргузор гардид. Дар ифтитоҳи он генерал-майор Камолзода Ҷамшед Ҷамол бо сухани муқаддимавӣ баромад намуда, нақши муҳими шарикони байналмилалиро дар татбиқи лоиҳаи минтақавии GLOFCA таъкид карданд.
Дар анҷоми чорабинӣ ёддошти тафоҳум оид ба интиқоли таҷҳизот барои огоҳсозии барвақтӣ ва мониторинги кӯлҳои пиряхии хавфнок ба имзо расонида шуд.
Иштирокчиёни саммит ҳамчунин дар дигар чорабиниҳои соҳавӣ, ки ба масъалаҳои мутобиқшавӣ ба тағйирёбии иқлим, коҳиши хатари офатҳои табиӣ, омӯзиши криосфера, мониторинги кӯлҳои пиряхии хавфнок, селҳои босуръат ва пешгирӣ ва рафъи ҳолатҳои фавқулода бахшида шудаанд, фаъолона иштирок намуданд.
Саммити минтақавии экологӣ–2026 аҳамияти худро ҳамчун платформаи муассири таҳкими ҳамкорӣ ва таҳияи қарорҳои муштарак дар самти амнияти экологӣ ва рушди устувори минтақа бори дигар собит намуд.
